​រដ្ឋចាប់ដៃជាមួយ​វិស័យឯកជន ​ទូទាត់ថ្លៃសេវា​ទូរគមនាគមន៍

ទូរគមនាគមន៍កម្ពុជា​នៅថ្ងៃទី ៧ ​ឧសភា ​២០២៦ ​បាន​ចុះហត្ថលេខា​លើ​អនុស្សរណៈ​នៃការ​យោគ​យល់​គ្នា​ជាមួយ ​ធនាគារ ​អេស៊ីលីដា ​ភីអិលស៊ី ​ស្តីពីការប្រើប្រាស់សេវាកម្មរបស់ធនាគារ ​អេស៊ីលីដា សម្រាប់ការទូទាត់ថ្លៃសេវារបស់ទូរគមនាគមន៍កម្ពុជា​។

​ពិធីចុះអនុស្សរណៈនេះធ្វើឡើង​ ក្រោមអធិបតីភាពលោកបណ្ឌិត​ សឿង ម៉ូរ៉ារិទ្ធ អគ្គនាយក​នៃទូរគមនា​គមន៍​កម្ពុជា ​និង លោក​បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី។​

ការសហការនេះក៏ភ្ជាប់ជាមួយប្រព័ន្ធទូទាត់ឌីជីថលរបស់ធនាគារជាតិនៃកម្ពុជា ដែលកំពុងរីកចម្រើនយ៉ាងរហ័សគឺ ​ប្រព័ន្ធ Bakong ។ ប្រព័ន្ធBakong ត្រូវបានដាក់ឲ្យប្រើប្រាស់នៅឆ្នាំ ២០២០ ​ដែលបច្ចុប្បន្នប្រព័ន្ធនេះមានអ្នកប្រើប្រាស់លើសពី ២០ លាននាក់ និង ប្រតិបត្តិការជាសាច់ប្រាក់ជាង ៣០ ពាន់លានដុល្លារត្រឹមដំណាច់ឆ្នាំ ២០២៥ ​។ ការទូទាត់តាម QR ក្រោមប្រព័ន្ធ Bakong ឥឡូវនេះត្រូវបានប្រើប្រាស់យ៉ាងទូលំទូលាយក្នុងវិស័យលក់រាយ សណ្ឋាគារ និង ការទូទាត់ឆ្លងប្រទេស ដោយកាត់បន្ថយការពឹងផ្អែកលើសាច់ប្រាក់។

​អនុស្សរណៈ​នៃការ​យោគ​យល់​គ្នា​នេះ ក៏ផ្ដល់ភាពងាយស្រួល​ ឆាប់រហ័សដល់​សាធារណជន ​ក្នុង​ការទូទាត់​ថ្លៃសេវារបស់ទូរគមនាគមន៍កម្ពុជា ​និង​ទូទាត់​សេវាផ្សេងៗ​ទៀតតាម​តម្រូវ​ការ ​តាម​រយៈ​កម្មវិធី ​អេស៊ីលីដាម៉ូបាល ​(អេស៊ីស៊ូភើអេប) ​អេស៊ីលីដាអ៊ីនធឺណែត ទូទាត់​តាម​ប្រព័ន្ធ (X-Pay, Deeplink, KHQR) ​ទូទាត់វិក្កយបត្រតាមប្រព័ន្ធ MPGS (International Payment Gateway)​ ទូទាត់តាម WeChat Pay ​ទូទាត់វិក្កយបត្រតាមបញ្ជរធនាគារ ​ឬនៅតាម​បណ្តា​សា​ខា​ការិយា​ល័យ​ ប្រតិបត្តិការ​របស់​ធនាគារ ​អេស៊ីលីដា ​នៅ​ទូទាំង​ប្រទេស។​

​អនុស្សរណៈនេះ​ ក៏មានគោលបំណងបង្កើនប្រសិទ្ធភាពនៃការផ្ដល់សេវាធនាគារពាណិជ្ជ និងជំរុញ​ការប្រើប្រាស់បច្ចេក​វិទ្យាហិរញ្ញវត្ថុ (FinTech) នៅក្នុងវិស័យទូរគមនាគមន៍ ដើម្បីផ្តល់ភាពងាយស្រួល សុវត្ថិភាព និងលឿនរហ័ស ក្នុងការទូទាត់តាមប្រព័ន្ធឌីជីថលនឹងជួយកាត់បន្ថយ​ការចំណាយ​ពេល​វេលា ផ្តល់នូវសុវត្ថិភាពខ្ពស់ និងមានតម្លាភាព៕