សម្តេចតេជោ រំឮកថារដ្ឋត្រៀមថវិកាខ្ទង់ពាន់លានដុល្លារសម្រាប់ស្តារហេដ្ឋារចនាសម្ព័ន្ធទ្រង់ទ្រាយធំ ប៉ុន្តែកូវីដបង្អាក់គម្រោង

ក្រោមគោលនយោបាយ «ឈ្នះ-ឈ្នះ» និងការអនុវត្តគោលការណ៍សន្សំសំចៃ បន្ទាប់ពីកម្ពុជាទទួលបានសន្តិភាពពេញលេញ រដ្ឋាភិបាលកម្ពុជាដៃម្ខាងទទល់ជម្លោះផ្ទៃក្នុង និងដៃម្ចាងទៀតខិតខំកសាង ដោយប្រើវិធីសាស្រ្តសន្សំសំចៃ ដើម្បីអភិវឌ្ឍហេដ្ឋារចនាសម្ព័ន្ធនានា ដើម្បីបម្រើឱ្យប្រយោជន៍សាធារណៈ។

តាមរយៈការសន្សំសំចៃជាបន្តបន្ទាប់ និងការគ្រប់គ្រងថវិកាប្រកបដោយប្រសិទ្ធភាព រហូតមកដល់ឆ្នាំ ២០២០ រដ្ឋាភិបាលអាចសន្សំថវិកាបានក្នុងទំហំរាប់ពាន់លានដុល្លារអាមេរិក សម្រាប់ការស្តារ និងអភិវឌ្ឍហេដ្ឋារចនាសម្ព័ន្ធផ្លូវថ្នល់ទូទាំងប្រទេស។ ទោះជាយ៉ាងណា រលកនៃជំងឺកូវីដ-១៩ ដែលបានរីករាលដាលនៅទូទាំងពិភពលោក រួមទាំងកម្ពុជាផង បានធ្វើឱ្យផែនការអភិវឌ្ឍន៍មួយចំនួនរបស់រដ្ឋាភិបាលត្រូវជួបការរាំងស្ទះ និងពន្យារពេល។

ក្នុងឱកាសអញ្ជើញទស្សនាអគារទីស្នាក់ការកណ្តាលថ្មីនៃអគ្គនាយកដ្ឋានពន្ធដារ នាថ្ងៃទី២ ខែមិថុនា ឆ្នាំ២០២៦ សម្តេចតេជោ ហ៊ុន សែន ប្រមុខរដ្ឋស្តីទី បានមានប្រសាសន៍រំលឹកអំពីដំណើរតស៊ូ និងកិច្ចខិតខំប្រឹងប្រែងរបស់រាជរដ្ឋាភិបាល ចាប់តាំងពីគ្រាដែលប្រទេសជាតិជួបការលំបាកខ្លាំង ទាំងខ្វះខាតថវិកា ហើយពេលខ្លះសូម្បីតែប្រាក់បៀវត្សរ៍សម្រាប់មន្ត្រីរាជការក៏មិនមានគ្រប់គ្រាន់ផងដែរ។ ទោះបីជាប្រឈមនឹងឧបសគ្គជាច្រើនក្តី ក្រោមការដឹកនាំរបស់សម្តេច និងថ្នាក់ដឹកនាំកម្ពុជា ប្រទេសកម្ពុជាបានបន្តអភិវឌ្ឍឥតឈប់ឈរ ព្រមទាំងអនុវត្តការគ្រប់គ្រង និងការសន្សំសំចៃថវិកាប្រកបដោយប្រសិទ្ធភាព ដែលបានរួមចំណែកយ៉ាងសំខាន់ដល់ការរីកចម្រើនរបស់ប្រទេសជាតិ។

សម្តេចតេជោ បានទម្លាយឱ្យដឹងថា៖«ពេលនោះយើងសន្សំប្រាក់ បានប្រមាណជា ៤ពាន់លានដុល្លារ ប៉ុន្តែកូវីដ បានធ្វើបាបយើង ធ្វើឱ្យស្រុតផែនការមិនបានសម្រេច»។ បើសិនមិនមានកូវីដ ១៩ ធ្វើបាបយើង ខ្ញុំនិយាយបានថា ​ពេលនោះយើងដកត្រឹមតែ ២ពាន់លានដុល្លារ ឬ ២៥០០ ដុល្លារយកមកធ្វើហេដ្ឋារចនាសម្ព័ន្ធឱ្យខ្លាំងដោយមិនពឹកពាក់បរទេស»។

ក្រៅពីមានផែនការដកប្រាក់សន្សំមកអភិវឌ្ឍហេដ្ឋារចនាសម្ព័ន្ធ សម្តេចបង្ហើបថាបានត្រៀមគម្រោង ១ពាន់លានដុល្លារ សម្រាប់ទិញម៉ាស៊ីនភ្លើង ៤០០ មេកាវ៉ាត់ ដាក់នៅជិតក្រុងភ្នំពេញ ដើម្បីត្រៀមសង្គ្រោះ ក្នុងករណីមានការដាច់ចរន្តអគ្គិសនីផងដែរ។ ប៉ុន្តែយ៉ាងណាក៏ដោយ បន្ទាប់ពីកូវីដ ១៩ សម្តេចតេជោអះអាងថា កម្ពុជាបានស្តារសេដ្ឋកិច្ចប្រទេសឡើងវិញ និងមានសន្ទុះកំណើនជាបន្តបន្ទាប់។ តួយ៉ាង គិតត្រឹមរយៈពេល ៥ ខែ ឆ្នាំ ២០២៦ នៃចំណូលពន្ធដារសម្រេចបានជាង៥៣% គិតជាទំហំទឹកប្រាក់ជាង ២ពាន់លានដុល្លារ។

កាលពី​ឆ្នាំ ២០១៩ រដ្ឋាភិបាល​បាន​ទម្លាក់​ថវិកា​ជាតិដ៏ច្រើន​ប្រមាណ​ជិត ៣០០ លាន​ដុល្លារ ស្ថាបនា​ផ្លូវ​ចំនួន ៣៧ ខ្សែ​​មាន​ប្រវែង ៨៤ គីឡូម៉ែត្រ ក្នុង​គោលដៅ​ប្រែក្លាយ​ក្រុងព្រះសីហនុ ទៅ​ជាទីក្រុង​ទំនើប​ដែល​មាន​សោភណភាព បរិស្ថាន​ល្អ សម្រាប់​ការ​រស់នៅ ទេសចរណ៍ និង​ធុរកិច្ច៕