ព័ត៌មានអន្ដរជាតិ

ភ្នាក់ងារស៊ើបការណ៍៖ ជាមធ្យម រុស្ស៊ីអាចបាញ់មីស៊ីលប្លោងប្រមាណ១០០គ្រាប់ក្នុង១ខែ ចូលអ៊ុយក្រែន

បានផុស

១៦ វិនាទី មុន

នៅ

ថ្ងៃសុក្រ ៥ មិថុនា ២០២៦

ដោយ

ការវាយតម្លៃរបស់ទីភ្នាក់ងារស៊ើបការណ៍សម្ងាត់យោធាអ៊ុយក្រែន (HUR) បានឱ្យដឹងថា រុស្ស៊ីអាចបាញ់មីស៊ីលផ្លោងរហូតដល់ ១០០គ្រាប់ក្នុងមួយខែ វាយប្រហារមកលើទឹកដីអ៊ុយក្រែន ខណៈទីក្រុងមូស្គូនៅតែរក្សាបាននូវសន្និុធិអាវុធទាំងនោះយ៉ាងមានស្ថិរភាព។ នេះបើយោងតាមសារព័ត៌មាន Kyiv Post ផ្សាយថ្ងៃទី០៤ ខែមិថុនា ឆ្នាំ២០២៦ ។

ជាការឆ្លើយតបទៅនឹងសេចក្តីរាយការណ៍របស់ Ukrainska Pravda ចេញផ្សាយនៅថ្ងៃព្រហស្បតិ៍ ទី៤ ខែមិថុនា ទីភ្នាក់ងារសម្ងាត់អ៊ុយក្រែន HUR បានលើកឡើងថា ឧស្សាហកម្មយោធាដ៏សម្បូរបែបរបស់រុស្ស៊ីមានគម្រោងផលិតមីស៊ីលផ្លោង 9M723 ប្រហែល ៧០០គ្រាប់ សម្រាប់ប្រព័ន្ធមីស៊ីលយុទ្ធសាស្ត្រ Iskander ក្នុងឆ្នាំ២០២៦ ដែលមានកម្រិតដូចគ្នានឹងឆ្នាំមុន។

មីស៊ីលបាលីស្ទិករុស្ស៊ី។ រូបភាព៖ The New York Post

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារសម្ងាត់នេះ រុស្ស៊ីកំពុងផលិតមីស៊ីលផ្លោង Iskander ចន្លោះពី៥៥ ទៅ ៦០គ្រាប់ ក្នុងមួយខែ។

ភ្នាក់ងារ HUR និយាយថា៖ « ដោយសារអត្រាផលិតទាំងនោះ សត្រូវអាចប្រើប្រាស់មីស៊ីលផ្លោងរហូតដល់ ១០០គ្រាប់ក្នុងមួយខែ ប្រឆាំងនឹងគោលដៅនៅលើទឹកដីអ៊ុយក្រែន ខណៈពួកគេនៅតែរក្សាបានកម្រិតបម្រុងដែលមានស្ថេរភាព»។

ចារកម្មយោធា ក៏បានរាយការណ៍ពីការកើនឡើងយ៉ាងខ្លាំងនៃការផលិតមីស៊ីល RM-48U ប្រើប្រាស់ដោយប្រព័ន្ធការពារដែនអាកាស S-300PM និង S-400 ដែលរុស្ស៊ីបានប្រើកាន់តែច្រើនក្នុងការវាយប្រហារផ្ទាល់ដីប្រឆាំងនឹងគោលដៅអ៊ុយក្រែន។

យោងតាម HUR រុស្ស៊ីមានគម្រោងផលិតមីស៊ីលទាំងនោះជាង ៤៨០ គ្រាប់ នៅឆ្នាំ២០២៦ បើប្រៀបធៀបទៅនឹង ២០០គ្រាប់ កាលពីឆ្នាំ ២០២៥ ។

អត្រាផលិតកម្មបច្ចុប្បន្នត្រូវបានប៉ាន់ប្រមាណថាមានរហូតដល់ ៥០គ្រាប់ក្នុងមួយខែ។

យោងតាមការវាយតម្លៃចារកម្ម រុស្ស៊ីក៏មានគម្រោងផលិតមីស៊ីលបាលីស្ទិកល្បឿនលឿនជាងសំឡេង Kinzhal រហូតដល់ ៦០គ្រាប់ ក្នុងឆ្នាំនេះផងដែរ។

តួលេខខាងលើបង្ហាញថា ទីក្រុងមូស្គូកំពុងបន្តពង្រីកសមត្ថភាពផលិតមីស៊ីលរបស់ខ្លួន ទោះបីជាមានទណ្ឌកម្មពីលោកខាងលិចនិងកិច្ចខិតខំប្រឹងប្រែង ដើម្បីរឹតត្បិតការចូលប្រើប្រាស់សមាសធាតុសំខាន់ៗក៏ដោយ៕

សម្រួល៖ ណឺ មិនា