ព័ត៌មានអន្ដរជាតិ

ហ្សេលេនស្គី ទទូចឱ្យសម្ព័ន្ធមិត្តអឺរ៉ុប ផ្តល់ប្រព័ន្ធការពារដែនអាកាស ដើម្បីទប់មីស៊ីលរុស្ស៊ី

បានផុស

២ នាទី មុន

នៅ

ថ្ងៃព្រហស្បតិ៍ ៤ មិថុនា ២០២៦

ដោយ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ជំរុញឱ្យសម្ព័ន្ធមិត្តអឺរ៉ុប បន្តបង្កើនការផ្គត់ផ្គង់ប្រព័ន្ធការពារដែនអាកាសបន្ថែមទៀត ខណៈការសន្យាផ្តល់មូលនិធិដោយអង្គការណាតូ ជួបប្រទះនូវភាពយឺតយ៉ាវយ៉ាងខ្លាំង។

លោក ហ្សេលេនស្គី ប្រាប់អ្នកយកព័ត៌មាននៅទីក្រុងកៀវថា៖ « មីស៊ីលបាលីស្ទីករុស្ស៊ីគឺជាអំណះអំណាងចុងក្រោយក្នុងសង្គ្រាមប្រឆាំងនឹងអ៊ុយក្រែន ហើយយើងត្រូវតែស្វែងរកការឆ្លើយតបគ្រប់គ្រាន់ ចំពោះពួកគេវិញ។ ដូច្នេះ វានឹងជួយច្រើនក្នុងការផ្តោតលើការការពារ ប្រឆាំងនឹងមីស៊ីលបាលីស្ទីកជាពិសេស»។

ប្រធានាធិបតីអ៊ុយក្រែន លោក ហ្សេលេនស្គី ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Politico រាយការណ៍នៅថ្ងៃទី០៣ ខែមិថុនា ឆ្នាំ២០២៦ ទីក្រុងកៀវបានស្នើសុំម្តងហើយម្តងទៀតដល់សម្ព័ន្ធមិត្តណាតូឱ្យផ្តល់ ប្រព័ន្ធស្ទាក់ចាប់ Patriot ដ៏សំខាន់ផលិតដោយសហរដ្ឋអាមេរិកមកដល់ខ្លួន ព្រោះវាអាចបំផ្លាញមីស៊ីលបាលីស្ទីករបស់រុស្ស៊ីបាន។

គួរបញ្ជាក់ថា សំណើចុងក្រោយបំផុតបានកើតឡើងមួយថ្ងៃ បន្ទាប់ពីរលកដ្រូននិងមីស៊ីលរបស់រុស្ស៊ីបានសម្លាប់មនុស្ស ១២នាក់ ក្នុងរដ្ឋធានីអ៊ុយក្រែន។

បណ្តាប្រទេសសហភាពអឺរ៉ុបបានយល់ព្រមលើប្រាក់កម្ចីចំនួន ១០០ប៊ីលានដុល្លា ដើម្បីគាំទ្រអ៊ុយក្រែនរហូតដល់ឆ្នាំ២០២៧។

កាលពីខែកុម្ភៈ សម្ព័ន្ធមិត្តណាតូក៏បានសន្យាផ្តល់ប្រាក់កម្ចីចំនួន ៣៥ប៊ីលានដុល្លារ ជួយពង្រឹងការការពារដែនអាកាសរបស់ទីក្រុងកៀវផងដែរ។ ដោយរដ្ឋមន្ត្រីក្រសួងការពារជាតិអាល្លឺម៉ង់ លោក Boris Pistorius លើកឡើងថា ប្រាក់កម្ចីនេះអាចរួមបញ្ចូលមីស៊ីល Patriot PAC-3 ចំនួន ៣៥គ្រាប់។

ប៉ុន្តែ លោក ហ្សេលេនស្គី ព្រមានថា៖ « បញ្ហានេះលែងទាក់ទងនឹងការផ្តល់ហិរញ្ញប្បទានតែមួយមុខទៀតហើយ ព្រោះបរិមាណនៃការដឹកជញ្ជូនបានថយចុះយ៉ាងឆាប់រហ័ស បន្ទាប់ពីសង្គ្រាមផ្តើមដោយសហរដ្ឋអាមេរិកនៅអ៊ីរ៉ង់ ធ្វើឱ្យស្ថានការណ៍កាន់តែធ្ងន់ធ្ងរឡើងលើស្តុកអាវុធសំខាន់ៗទូទាំងពិភពលោក»៕

សម្រួល៖ ណឺ មិនា