ប្រធានសភាអ៊ីរ៉ង់៖ ​​​អ៊ីស្រាអែល​និងមូលដ្ឋានទ័ព​និង​ទ្រព្យ​​អាមេរិក​ ជាគោលដៅវាយ​បក​ស្រប​ច្បាប់របស់​អ៊ីរ៉ង់​

ប្រធានសភា និង​ជា​ប្រធានក្រុម​ចរចា​អ៊ីរ៉ង់​ លោក Mohammad Bagher Ghalibaf បាន​លើក​ឡើង​ថា ការបិទខ្ទប់ផ្លូវទឹកប្រឆាំងនឹងប្រជាជាតិអ៊ីរ៉ង់ និងការបើកភ្លើងខៀវពីសំណាក់សហរដ្ឋអាមេរិកដល់របបដឹកនាំ​នៅ​អ៊ីស្រាអែល នាពេលនេះ បានធ្វើឲ្យមូលដ្ឋានទ័ព និងទ្រព្យសម្បត្តិទាំងអស់របស់អាមេរិក និងអ៊ីស្រាអែលនៅក្នុងតំបន់ ក្លាយជាគោលដៅវាយប្រហារដ៏ស្របច្បាប់​របស់​អ៊ីរ៉ង់​​។

​មេដឹកនាំ​អ៊ីរ៉ង់​ដ៏មានឥទ្ធិពល​​រូបនេះ បាន​សង្កត់ធ្ងន់ថា កងកម្លាំងប្រដាប់អាវុធអ៊ីរ៉ង់មានសិទ្ធិសេរីភាពពេញលេញក្នុងការចាត់វិធានការ ដូចដែលធ្លាប់មានពីមុនមក។ នេះបើយោងតាមការចេញផ្សាយ ពីសារព័ត៌មានអ៊ីរ៉ង់ ISNA កាលពីថ្ងៃទី៧ ខែមិថុនា ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការបង្ហោះលើគណនី X ផ្ទាល់ខ្លួន លោក Ghalibaf បានឆ្លើយតបទៅនឹងការវាយប្រហាររបស់របប​អ៊ីស្រាអែល​លើតំបន់ជាយក្រុង Dahiyeh នៃប្រទេសលីបង់ និងជំហរចុងក្រោយរបស់ប្រធានាធិបតីអាមេរិក លោក ដូណាល់ ត្រាំ ដោយបានសរសេរថា «ពួកគេមិនគោរពបទឈប់បាញ់ ហើយក៏មិនជឿលើការសន្ទនាដែរ។ តាមរយៈការបិទខ្ទប់ផ្លូវទឹក និងការរំលោភលើកិច្ចព្រមព្រៀងពាក់ព័ន្ធនឹងប្រទេសលីបង់ ពួកគេបានបង្ហាញឲ្យឃើញច្បាស់ថា ពួកគេស្គាល់តែភាសានៃអំណាច និងការប្រើកម្លាំងបាយប៉ុណ្ណោះ»។

យ៉ាងណាមិញ នាថ្ងៃដដែលនោះ ក្រសួងសុខាភិបាលលីបង់បានប្រកាសថា មនុស្សយ៉ាងហោចណាស់ ២ នាក់បានស្លាប់ និង ១១ នាក់ផ្សេងទៀតបានរងរបួស បន្ទាប់ពីអ៊ីស្រាអែលបានបើកការវាយប្រហារលើភាគខាងត្បូងទីក្រុងបេរូត។ ការវាយប្រហារនេះបានតម្រង់ចំអគារស្នាក់នៅរបស់ប្រជាពលរដ្ឋ នៅក្នុងសង្កាត់ Mreijeh និងសង្កាត់ Tahouitet el Ghadir នៃក្រុងបេរូត ខណៈដែលប្រតិបត្តិការជួយសង្គ្រោះកំពុងបន្តធ្វើឡើង។

ដោយឡែក ប្រភពពីទីភ្នាក់ងារការពារស៊ីវិលក្នុងតំបន់បានប្រាប់ទីភ្នាក់ងារសារព័ត៌មាន​រុស្ស៊ី TASS ថា ដ្រូនរបស់អ៊ីស្រាអែល បានបើកការវាយប្រហារចំគោលដៅលើសង្កាត់ភាគខាងត្បូងនៃទីក្រុងបេរូត ដើម្បីសង​សឹក​នឹង​ការវាយប្រហារដោយគ្រាប់ផ្លោងលើទីតាំងលំនៅឋាន​របស់ខ្លួននៅតំបន់ Upper Galilee។

យោងតាមទូរទស្សន៍ Al Hadath ការវាយប្រហារតាមផ្លូវអាកាសនេះ ត្រូវបានធ្វើឡើងដោយប្រើប្រាស់យន្តហោះចម្បាំងចំនួន ២ គ្រឿង រួមទាំងដ្រូនជាច្រើនគ្រឿង ដោយបានកំណត់គោលដៅលើការិយាល័យ និងឃ្លាំងផ្ទុកទំនិញរបស់ក្រុមហេសបូឡា៕

អត្ថបទ ៖ សាង ស្រីល័ក្ខ