រដ្ឋមន្ត្រីសុខាភិបាល ក្រើនរម្លឹកដល់នាយកដ្ឋានទាំងអស់ បន្តយកចិត្តទុកដាក់ខ្ពស់លើបញ្ហាជំងឺឆ្លង ពិសេសជំងឺអេបូឡា

លោកសាស្ត្រាចារ្យ ឈាង រ៉ា រដ្ឋមន្ត្រីសុខាភិបាល បានក្រើនរម្លឹកដល់នាយកដ្ឋាន អង្គភាពទាំងអស់ បន្តយកចិត្តទុកដាក់កាន់តែខ្ពស់បន្ថែមទៀតលើបញ្ហាជំងឺឆ្លងនានា ពិសេសជំងឺ អេបូឡា Ebola ដែលកំពុងរាតត្បាតនៅប្រទេសមួយចំនួន។

ការក្រើនរម្លឹកនេះ ធ្វើឡើងក្នុងឱកាសលោករដ្ឋមន្ត្រី ដឹកនាំកិច្ចប្រជុំកម្រិតថ្នាក់ដឹកនាំ លើកទី១ ប្រចាំខែមិថុនា ដើម្បីពិនិត្យវឌ្ឍនភាពការងារ និងលើកទិសដៅការងារបន្ត ដោយមានការអញ្ជើញចូលរួមពី ថ្នាក់ដឹកនាំក្រសួង និងអង្គភាពថ្នាក់កណ្តាល មន្ទីរសុខាភិបាលរាជធានីភ្នំពេញ និងតាមប្រព័ន្ធ Zoom ប្រធានមន្ទីរសុខាភិបាលខេត្ត នាថ្ងៃទី៨ ខែមិថុនា ឆ្នាំ២០២៦។

លោកសាស្រ្តាចារ្យ បានគូសបញ្ជាក់អំពីកិច្ចខិតខំប្រឹងប្រែងរបស់ថ្នាក់ដឹកនាំ មន្រ្តីរាជការ និងបុគ្គលិកសុខាភិបាល ដែលបានសម្រេចនូវសមិទ្ធផលជាបន្តបន្ទាប់ ដូចជាការប្រយុទ្ធប្រឆាំងនឹងជំងឺអេដស៍ ជំងឺគ្រុនចាញ់ ជំងឺរបេង ជំងឺមហារីក និងជំងឺមិនឆ្លងផ្សេងទៀត ដែលសមិទ្ធផលទាំងនេះ ត្រូវបានទទួលស្គាល់ និងសាទរពីគ្រប់អង្គការដៃគូជាតិ និងអន្តរជាតិ រួមទាំងអង្គការសុខភាពពិភពលោក។ លោកបានបន្ថែមថា ត្បិតប្រទេសកម្ពុជាមិនទាន់ជឿនលឿន ដល់កម្រឹតប្រទេសរីកចម្រើនឧស្សាហកម្ម តែមិត្តភក្តិបរទេសចម្រុះជាតិសាសន៍ មានការចាប់អារម្មណ៍យ៉ាងខ្លាំងលើវិស័យសុខាភិបាលកម្ពុជា ដែលកំពុងវិវត្តន៍ខ្លួនជាបន្តបន្ទាប់ក្នុងលំនាំស្តង់ដារសាកល។

ជាមួយគ្នានេះ លោកសាស្រ្តាចារ្យ បានជូនអនុសាសន៍ឱ្យអង្គភាពទាំងអស់ ពិនិត្យការរៀបចំផែនការរំកិល ៣ឆ្នាំឱ្យបានច្បាស់លាស់ និងគិតគូររៀបចំវិភាគមុខងារនៅតាមអង្គភាពរបស់ខ្លួនឱ្យបានល្អ ស្របតាមគោលការណ៍កំណែទម្រង់ជាអាទិភាព។

មុននឹងបញ្ចប់ លោករដ្ឋមន្ត្រី បានផ្តល់អនុសាសន៍មួយចំនួន​ដល់ថ្នាក់ដឹកនាំ និងមន្រ្តីសុខាភិបាលទាំងអស់ បន្តខិតខំបំពេញការងារ និងបំពេញបេសកកម្មរបស់ខ្លួន ក្នុងវិស័យសុខាភិបាលនេះឱ្យបន្តរីកចម្រើនទៅមុខ ជាមួយការវាស់វែងសមិទ្ធិផល។ ជាពិសេសក្នុងបរិបទ ឌីជីថលនេះ សូមឱ្យយកចិត្តទុកដាក់ក្នុងការសម្របខ្លួន ស្វែងយល់ស៊ីជម្រៅ និងទាញយកបច្ចេកវិទ្យាទាំងនោះ មកជាផលប្រយោជន៍ក្នុងការងារប្រចាំថ្ងៃ។

បន្តការងារលើកកម្ពស់សុខភាពបឋមកាន់តែសកម្ម ធ្វើយ៉ាងណាឱ្យសេវាសុខភាពបឋមនេះ បានទៅដល់ប្រជាពលរដ្ឋគ្រប់ៗរូប តាមគ្រប់រូបភាព និងបន្តយកចិត្តទុកដាក់លើការងារសហប្រតិបត្តិការ ជាមួយដៃគូអភិវឌ្ឍន៍នានា និងរៀបចំផែនការសកម្មភាព ដើម្បីស្វែងរកការគាំទ្របន្ថែមទៀតពីអង្គការនានា៕