ទាហានម៉ារីនថៃ ២០នាក់ របួស ក្នុងហេតុការណ៍ ក្រឡាប់រថយន្ត

ទាហានម៉ារីនថៃ ២០នាក់ រងរបួស ក្នុងគ្រោះថ្នាក់ចរាចរណ៍ ខណៈពេលពួកគេកំពុងធ្វើដំណើរ ត្រឡប់ទៅកាន់មូលដ្ឋានវិញ ទាំងដែលមេឃកំពុងភ្លៀង។

តាមការផ្សាយរបស់ Khaosod ដកស្រង់ប្រភពពីសមត្ថកិច្ចថៃ, ហេតុការណ៍នេះ កើតឡើងនាវេលាម៉ោ​ង ៤រសៀល ថ្ងៃពុធ ទី១ ខែកក្កដា ឆ្នាំ២០២៦ លើផ្លូវ Sukhumvit ក្នុងស្រុក Klaeng នៃខេត្ត Rayong ពេលកងម៉ារីនទាំងនោះ ធ្វើដំណើរទៅកាន់មូលដ្ឋាននៅស្រុក Sattahip ក្នុងខេត្ត Chon Buri។

ប្រភពខាងលើ បានឲ្យដឹងថា រថយន្តដំបូង បានរអិលផ្លូវ ទៅបុកជាមួយបង្គោលភ្លើង បណ្តាលឲ្យក្រឡាប់ របួសទាហាន ៣នាក់។ បន្ទាប់មក រថយន្តជិះពីក្រោយនោះ ក៏ឈប់ដើម្បីឲ្យអ្នកជិះ ចុះទៅជួយពួកគេ ប៉ុន្តែស្រាប់តែមានរថយន្តយោធា មួយគ្រឿងទៀតមកពីក្រោយ រួចចាប់ហ្វ្រាំងមិនទាន់ ត្រូវបង្ខំចិត្តបើកចៀស បណ្តាលឲ្យបាត់បង់ការគ្រប់គ្រង ក្រឡាប់របួសទាហាន ១៧នាក់ទៀត។

សរុបមក ក្នុងហេតុការណ៍នេះ មានទាហានម៉ារីន សរុប ២០នាក់ត្រូវរបួស ហើយមកទល់ពេលនេះ កងកម្លាំងថៃ កំពុងបើកការស៊ើបអង្កេតបន្ថែម លើករណីនេះ៕

អត្ថបទ៖ សុវណ្ណ