អាជីវករផ្សារសំរោងយ៉ោង២២នាក់វិជ្ជមានកូវីដ-១៩ ក្នុងចំណោមករណីថ្មីនៅតាកែវ

រដ្ឋបាលខេត្តតាកែវ នៅរសៀលថ្ងៃទី២១ ខែឧសភា ឆ្នាំ២០២១នេះ បានបង្ហាញអត្តសញ្ញាណអ្នកជំងឺកូវីដ-១៩ ចំនួន៤០នាក់ថ្មីបន្ថែមទៀត ដែលជាករណីឆ្លងក្នុងសហគមន៍ ដែលក្នុងនោះមានអាជីវករផ្សារសំរោងយ៉ោងចំនួន២២នាក់។

ការបង្ហាញអត្តសញ្ញាណនេះ ដើម្បីផ្តល់ជាព័ត៌មានដល់អ្នកដែលពាក់ព័ន្ធផ្ទាល់ ឬប្រយោល ទៅធ្វើតេស្តសុខភាព និងធ្វើចត្តាឡីស័ក។ ជាពិសេសត្រូវអនុវត្តន៍វិធានការសុខាភិបាលផ្សេងៗ ដើម្បីទប់ស្កាត់ការចម្លងជំងឺបន្ត។

រដ្ឋបាលតាកែវ បានអំពាវនាវដល់ប្រជាពលរដ្ឋដែលមានប្រាស្រ័យទាក់ទងជាមួយអ្នកកើតជំងឺកូវីដ-១៩ ប្រញាប់រាយការណ៍ជូនអាជ្ញាធរមូល និងរូសរាន់ទៅយកសំណាកនៅតាមមណ្ឌលសុខភាព ឬមន្ទីរពេទ្យបង្អែកនៅក្បែរផ្ទះ រាល់ម៉ោងធ្វើការ ធ្វើចត្តាឡីស័ក និងតាមដានសុខភាពខ្លួនឯង។ ក្នុងករណីមានភាពមិនប្រក្រតី ត្រូវប្រញាប់ទាក់ទងទៅក្រុមការងារមន្ទីរសុខាភិបាល ឬមន្ទីរពេទ្យបង្អែកតាមក្រុង ស្រុក ឬទាក់ទងទៅលេខ ០១៦ ៨៩៥ ៩៥៥ ៕

អត្ថបទ៖ ច័ន្ទ ​វីរៈ