បិទខ្ទប់បន្ទាយនគរបាល ក្រោយ​​មេបញ្ជាការ​២រូប ឆ្លង​កូវីដ-១៩

ខេត្តបាត់ដំបង៖ ទីតាំងវរសេនាតូចនគរបាលការពារព្រំដែនគោក លេខ៨១៩ ប្រចាំស្រុកកំរៀង ត្រូវបានអាជ្ញាធរ និងក្រុមគ្រូពេទ្យចុះបិទខ្ទប់ជាបណ្តោះអាសន្ន បន្ទាប់ពីបានរកឃើញថា មេបញ្ជាការ និងមេបញ្ជាការរង២នាក់ ផ្ទុកជំងឺកូវីដ-១៩ និងមន្ត្រីជាង២០រូប ដែលជាប់ពាក់ព័ន្ធត្រូវធ្វើចត្តាឡីស័កនៅក្នុងបន្ទាយតែម្តង។

យោងតាមរបាយការណ៍របស់អាជ្ញាធរ និងក្រុមគ្រូពេទ្យបានបញ្ជាក់ថា ចាប់តាំងពីល្ងាចថ្ងៃទី៨ ខែកក្កដា ឆ្នាំ២០២១ នេះតទៅ ទីតាំងបន្ទាយរបស់វរសេនាតូច នគរបាលការពារព្រំដែនគោកលេខ ៨១៩ ដែលស្ថិតនៅភូមិលំផាត់ ឃុំអូដារ ស្រុកកំរៀង ខេត្តបាត់ដំបង ត្រូវបានបិទខ្ទប់រយ:ពេល១៤ថ្ងៃ ដោយតម្រូវអោយមន្ត្រីនគរបាលដែលពាក់ព័ន្ធជាង​២០​នាក់ ធ្វើចត្តាឡីស័កនៅក្នុងអង្គភាពតែម្តង ។

របាយការណ៍បានបន្តថា ដោយឡែកចំពោះលោក វរសេនីយ៍ឯក ម៉ង់ សុី ជាមេបញ្ជាការ និងលោក វរសេនីយ៍ត្រី សន វិទ្ធី ជាមេបញ្ជាការរង ដែលមានវិជ្ជមានកូវីដ-១៩ កំពុងដាក់អោយសម្រាកព្យាបាលនៅក្នុងមណ្ឌលសុខភាពត្រាង៕

អត្ថបទ៖ សោ និយមរ័ត្ន