អធិការបតីអាល្លឺម៉ង់៖ អឺរ៉ុប ត្រូវតែម្ចាស់ការលើសន្តិសុខខ្លួនឯង ដើម្បីរក្សាសម្ព័ន្ធភាពណាតូ

អធិការបតីអាល្លឺម៉ង់ លោក Friedrich Merz បាននិយាយថា តំបន់អឺរ៉ុបត្រូវតែទទួលខុសត្រូវឲ្យ​កាន់តែធំ​​​លើសន្តិសុខរបស់ខ្លួន ប្រសិនបើចង់រក្សាទ្រង់ទ្រាយឆ្លងមហាសមុទ្រអាត្លង់ទិករបស់ណាតូ ស្របពេលដែលទីក្រុង​ប៊ែកឡាំង គ្រោងនឹងបង្កើនកញ្ចប់ថវិកាការពារជាតិស្នូល រហូតដល់ ៣.៥% នៃផលិតផលក្នុងស្រុកសរុប (GDP) ត្រឹមឆ្នាំ២០២៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន tvpworld ​បាន​ចុះ​ផ្សាយ​ថា​ នៅក្នុងការថ្លែងការណ៍កាលពីថ្ងៃ ទី១ ខែកក្កដា នៅទីក្រុងប៊ែកឡាំង រួមជាមួយអគ្គលេខាធិការណាតូ លោក Mark Rutte, លោក Merz បានទទួលស្គាល់ថា អាល្លឺម៉ង់ បានវិនិយោគខ្វះចន្លោះ លើវិស័យនេះអស់រយៈពេលជាច្រើនឆ្នាំមកហើយ ហើយពេលនេះកំពុងតែដើរលើផ្លូវកែ​តម្រូវ​ឡើងវិញ។

ផែនការនេះនឹងធ្វើឲ្យអាល្លឺម៉ង់ដើរលឿនជាងមុនជាច្រើនឆ្នាំ ធៀបនឹងកាលបរិច្ឆេទកំណត់របស់ណាតូត្រឹមឆ្នាំ២០៣៥ ក្នុងការឈានទៅសម្រេចឲ្យបាននូវការចំណាយលើការពារជាតិស្នូលចំនួន ៣.៥% នៃ GDP ដែលជាផ្នែកមួយនៃគោលដៅវិនិយោគថ្មីរបស់សម្ព័ន្ធភាពយោធាមួយនេះ។

គោលដៅនោះគឺជាចំណុចស្នូលនៃគោលដៅវិនិយោគធំជាងមុនចំនួន ៥% របស់ណាតូ ដែលក្នុងនោះគ្រោងទុក ៣.៥% នៃ GDP សម្រាប់ការចំណាយលើវិស័យយោធាផ្ទាល់ និងរហូតដល់ ១.៥% សម្រាប់ការចំណាយទាក់ទងនឹងសន្តិសុខ និងការពារជាតិទូលំទូលាយ ដូចជាហេដ្ឋារចនាសម្ព័ន្ធ និងភាពធន់ផ្នែកសន្តិសុខ។

របាយការណ៍មុនៗ ស្តីពីការស្ថាបនាកម្លាំងយោធារបស់អាល្លឺម៉ង់ បានគូសបញ្ជាក់ពីកិច្ចខិតខំប្រឹងប្រែងរបស់ទីក្រុងប៊ែកឡាំង ដើម្បីសម្រេចឲ្យបាននូវគោលដៅ ៣.៥% ត្រឹមឆ្នាំ២០២៩ ខណៈដែលក្របខ័ណ្ឌដែលកំពុងលេចរូបរាងឡើងរបស់ណាតូ អនុញ្ញាតឲ្យរាប់បញ្ចូលការចំណាយរហូតដល់ ១.៥% នៃ GDP ជាចំណាយពាក់ព័ន្ធនឹងការពារជាតិ និងសន្តិសុខ។

នៅក្នុងនោះផងដែរ អគ្គលេខាធិការអង្គការណាតូ លោក Mark Rutte បានកោតសរសើរចំពោះផែនការរបស់អាល្លឺម៉ង់ ប៉ុន្តែលោកបានលើកឡើងថា ការគាំទ្រពីអាមេរិកនៅតែជាចំណុចកណ្តាលសម្រាប់ការពារជាតិរបស់អ៊ុយក្រែន ដោយលោកបានបន្ថែមថា នៅពេលនិយាយដល់សន្តិសុខរបស់អ៊ុយក្រែន អាមេរិកគឺនៅតែជាភាគីដែលមិនអាចខ្វះបានដដែល។

ជារឿងដែលគួររំលឹកឡើងវិញផងដែរថា អស់រយៈពេលជាច្រើនទសវត្សរ៍មកហើយ អាមេរិកបានរិះគន់បណ្តាប្រទេសនៅអឺរ៉ុប ជាពិសេសអាល្លឺម៉ង់ ចំពោះការធ្វើការងារបែប «ជិះសេះមើលផ្កា ឬធ្វើលំៗ» ដោយពឹងផ្អែកលើឆ័ត្រការពារសន្តិសុខ និងអាវុធនុយក្លេអ៊ែររបស់អាមេរិក ប៉ុន្តែបដិសេធមិនព្រមចំណាយថវិកាឲ្យបានគ្រប់គ្រាន់លើវិស័យយោធានោះឡើយ។

កាលពីមុន ណាតូបានតម្រូវឲ្យប្រទេសជាសមាជិកចំណាយយ៉ាងហោចណាស់ ២% នៃ GDP ប៉ុន្តែអាល្លឺម៉ង់តែងតែចំណាយមិនគ្រប់ចំនួននោះទេ។ យ៉ាងណា ក្រោយវាយប្រហាររបស់រុស្ស៊ីលើអ៊ុយក្រែនមក អឺរ៉ុបក៏បានភ្ញាក់ខ្លួនដឹងខ្លួនឡើងវិញ។ អាល្លឺម៉ង់បានប្រកាសពីការផ្លាស់ប្តូរគោលនយោបាយយោធាថ្មីមួយ ដែលហៅថា «ចំណុចរបត់ថ្មី» ដោយបានវិនិយោគភ្លាមៗនូវទឹកប្រាក់រាប់ពាន់លានដុល្លារ ដើម្បីធ្វើទំនើបកម្មកងទ័ពរបស់ខ្លួន ដែលធ្លាប់តែត្រូវបានបោះបង់ចោលកាលពីមុន៕

អត្ថបទ ៖ សាង ស្រីល័ក្ខ

អាល្លឺម៉ង់ ប្រឹងប្រែង​ផលិតអាវុធរចនាដោយ អាមេរិក ក្នុងទឹកដីខ្លួន ដើម្បីពង្រឹងវិស័យការពារជាតិណាតូ

អត្ថបទ ៖ សាង ស្រីល័ក្ខ