ទឹកជំនន់ដ៏សាហាវនៅអឺរ៉ុប អ្នកស្លាប់កើនដល់ជាង ១០០នាក់ ខណៈរាប់ពាន់នាក់បាត់ខ្លួន

មនុស្សយ៉ាងតិច១២០នាក់បានស្លាប់ និងរាប់ពាន់នាក់ទៀតបាត់ខ្លួននៅអឺរ៉ុបខាងលិច បន្ទាប់ពីជួបគ្រោះទឹកជំនន់អាក្រក់បំផុត ក្នុងរយៈពេលជាច្រើនទសវត្សរ៍មកនេះ។

ភ្លៀងធ្លាក់ខ្លាំង បានធ្វើឲ្យទឹកទន្លេឡើងផុតច្រាំង ហើយបំផ្លិចបំផ្លាញតំបន់នានា។

នៅប្រទេសអាល្លឺម៉ង់ដែលមានចំនួនអ្នកស្លាប់ដល់ទៅជាង១០០នាក់ លោកស្រីអធិការបតី Angela Merkel បានអំពាវនាវឲ្យមានការប្រយុទ្ធប្រឆាំង នឹងបម្រែបម្រួលអាកាសធាតុ។

ទន្ទឹមនោះ មនុស្សយ៉ាងតិច ២០ នាក់បានស្លាប់នៅប្រទេសបែលហ្ស៊ិក។ ប្រទេសហូឡង់ លុចសំបួនិងស្វីសក៏រងផលប៉ះពាល់ដែរ។

មានកត្តាជាច្រើនរួមចំណែកដល់ទឹកជំនន់ដ៏សាហាវនេះ ប៉ុន្តែបរិយាកាសក្តៅដែលបណ្តាលមកពីការប្រែប្រួលអាកាសធាតុ បានធ្វើឲ្យមានភ្លៀងធ្លាក់ខ្លាំង។

ប៉ូលិស ទាហាននិងបុគ្គលិកសេវាកម្មសង្គ្រោះបន្ទាន់ប្រមាណ ១៥,០០០ នាក់ ត្រូវបានដាក់ពង្រាយនៅក្នុងប្រទេសអាល្លឺម៉ង់ ដើម្បីជួយក្នុងការស្វែងរកនិងជួយសង្គ្រោះ។

ភូមិទាំងមូលៗត្រូវបានបំផ្លាញ ហើយមន្រ្តីនៅស្រុក Ahrweiler ភាគខាងលិចប្រទេសអាល្លឺម៉ង់ បាននិយាយថា មានមនុស្សរហូតដល់ទៅ ១,៣០០ នាក់កំពុងបាត់ខ្លួន៕

ប្រែសម្រួល៖ Vann Vann

ប្រភព៖ BBC

ចុចអាន៖ ទឹកជំនន់មរណៈនៅ អាល្លឺម៉ង់និងបែលហ្សិក សម្លាប់មនុស្សកើនដល់ជិត ១០០នាក់