វប្បធម៌ ជំនឿ

រដូវបុណ្យទាន កុំរវល់ខ្វាយខ្វល់ជាមួយរឿងឥតបានការ រហូតភ្លេចព្រះកន្លោងចាំនៅឯផ្ទះ

បានផុស

៤ years មុន

នៅ

ថ្ងៃសុក្រ ២៤ កញ្ញា ២០២១

ដោយ

«ធ្វើបុណ្យ ទាន់ខែភ្លឺ» ជាប្រយោគមួយដែលអ្នកណាៗក៏បានដឹង បានឭ ។ បុណ្យនេះជាបុណ្យដ៏ប្រពៃមួយ ដែលកូនចៅខ្មែរមិនអាចមើលរំលងបានឡើយ។ សូម្បីខាងពុទ្ធសាសនា ក៏បានរំលឹកទូន្មានថា ធ្វើបុណ្យ ៧ វត្ត មិនស្មើធ្វើបុណ្យជាមួយព្រះកន្លោង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការធ្វើបុណ្យសាងកុសលនៅតាមវត្តអារាម ជាមួយព្រះសង្ឃ តាជី យាយជី ឬដាក់ទានដល់អ្នកខ្សត់ខ្សោយជាងខ្លួន អាចឲ្យយើងអាចបាត់សៅហ្មង លុបលាងកម្មពៀរបានខ្លះដែរ។ យ៉ាងណាមិញ មុនធ្វើចង្ហាន់ទៅប្រគេនព្រះសង្ឃ គង់តាមវត្តអារាម សូមឲ្យនឹកដល់មនុស្ស ២ នាក់ ដែលអ្នកបានឃើញមុខមុនគេ ស្របពេលយើងបានបង្ហាញវត្តមានលើផែនដីមួយនេះ។

បុគ្គលខ្លះ ខំចំណាយលុយគ្រប់យ៉ាង ធ្វើបុណ្យឧទិសដល់អ្នកដែលបានចែកឋាន រហូតភ្លេចឪពុកម្ដាយ លោកតាលោកយាយ ដែលកំពុងមានជីវិតនៅលើផែនដីនេះ។ ខ្លះក៏រវល់រត់តាមផ្គាប់ចិត្តគេ ដើម្បីគេមកស្រលាញ់ពេញចិត្តខ្លួន។ ខ្លះក៏ទៅបំពេញចិត្តគេ យកបុណ្យសាងលាភមកដល់ខ្លួនក៏មាន។ ខណៈឪពុកម្ដាយមួយចំនួន មិនមានម្ហូបអាហារ និងនំចំណីឆ្ងាញ់ៗ សម្រាប់បរិភោគ ដោយសារកូនៗ បានយកនំចំណីនិងអាហារឆ្ងាញ់ៗទាំងនោះ ទៅប្រគេនព្រះសង្ឃ និងដាក់សែននៅមុខផ្នូរឬចេតិយរបស់អ្នកស្លាប់។

ការធ្វើបុណ្យជាមួយព្រះសង្ឃ ចាស់ព្រឹទ្ធាចារ្យ និងអ្នកខ្សត់ខ្សោយជាងខ្លួន គឺជារឿងត្រឹមត្រូវ។ ប៉ុន្តែត្រូវធ្វើបុណ្យដោយបញ្ហាស្មារតីភ្លឺស្វាង មិនមែនចេះតែតាមគ្នាឡើយ។ ការធ្វើបុណ្យនៅខាងក្រៅ ដោយភ្លេចឪពុកម្ដាយរបស់ខ្លួននៅក្នុងផ្ទះបែបនេះ គឺមិនមានឈ្មោះថា ជាការធ្វើបុណ្យ ដែលប្រកបដោយបញ្ញាឡើយ។ ការក្រាបសំពះ និងការសងគុណឪពុកម្ដាយ គឺជាអំពើដែលនាំឲ្យកើតបុណ្យកុសលយ៉ាងច្រើនក្រៃលែង ដែលកូនប្រុសស្រីមិនត្រូវមើលរំលង។

ឪពុកម្ដាយ គឺជាព្រះរស់នៅក្នុងផ្ទះ ដែលមានគុណធំជាងសមុទ្ររាប់រយយោជន៍ចំពោះកូនប្រុសស្រី ដោយមិនអាចគណនាបាន ។ ហេតុដូច្នេះហើយ កូនប្រុសស្រីគ្រប់រូប ត្រូវតែមានកតញ្ញុតាធម៌ក្នុងខ្លួន ហើយតបស្នងសងគុណលោកទាំងពីរវិញ ដោយមិនត្រូវព្រងើយកន្តើយជាដាច់ខាត។ បើចង់សងគុណ ឬចង់ជូនបាយទឹក និងនំចំណី យើងត្រូវតែធ្វើឲ្យហើយ ទាន់ឪពុកម្ដាយនៅមានជីវិត អាចបរិភោគរបស់ទាំងនោះបាន ដែលត្រូវនឹងសុភាសិតខ្មែរ បានពោលថា «ធ្វើបុណ្យ ទាន់ខែភ្លឺ»៕

អត្ថបទ៖ សាង ស្រីល័ក្ខ

ចុចអាន៖ហេតុអ្វីគេចាត់ទុកបិណ្ឌ ១ និងភ្ជុំធំ ជាថ្ងៃសំខាន់មិនអាចអាក់ខានបាន?

ចុចអាន៖តាមជំនឿដូនតាខ្មែរ ការពូនភ្នំខ្សាច់ ពិតជាអាចផ្ដាច់កម្មពៀរចាស់ៗពីអតីតជាតិបានពិតមែន

ចុចអាន៖ខណៈ កម្ពុជា កំពុងប្រារព្ធបុណ្យភ្ជុំបិណ្ឌ ប្រទេសអាស៊ីណាខ្លះមានពិធីនេះស្រដៀងខ្មែរដែរ