ប្រធានគណៈកម្មការមួយនៃរដ្ឋសភា ថា ការចរាចរក្រដាសប្រាក់៣ម៉ឺនរៀលថ្មី មិនត្រឹមតែឆ្លុះបញ្ចាំងពីមនោសញ្ចេតនាចំពោះសម្តេចតានោះទេ

លោក ហ៊ុន ម៉ានី បានអះអាងថា ការដាក់ឲ្យចរាចរនូវក្រដាសប្រាក់ប្រភេទ៣០,០០០រៀលថ្មី មិនត្រឹមតែឆ្លុះបញ្ចាំង​ពីមនោសញ្ចេតនាដ៏ជ្រៀលជ្រៅរបស់កូនចៅចំពោះសម្តេចតានោះទេ តែបានឆ្លុះបញ្ចាំងពីដំណើរវិវឌ្ឍប្រកបដោយភាពវិជ្ជមានរបស់សង្គមកម្ពុជា ក្នុងរយៈពេល ៣០ឆ្នាំកន្លងមកនេះ។

ការអះអាងរបស់ប្រធានគណៈកម្មការអប់រំ យុវជន កីឡា កិច្ចការសាសនា វប្បធម៌ និងទេសចរណ៍ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានធ្វើឡើងនាព្រឹកថ្ងៃទី១៨ ខែតុលា នេះ និងបន្ទាប់ពីរាជរដ្ឋាភិបាលកម្ពុជាចេញអនុក្រឹត្យលេខ២០០អនក្រ.បក អនុញ្ញាតដាក់ឲ្យចរាចរ និងប្រើប្រាស់ទូទាំងប្រទេស ក្រដាសប្រាក់ប្រភេទ៣០០០០រៀលគំរូថ្មី  ដើម្បីអបអរខួប៣០ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស និងខួប៣០ ឆ្នាំ នៃការយាងនិវត្តន៍របស់ព្រះករុណាព្រះបាទ សម្តេចព្រះនរោត្តម សីហនុ “ព្រះបរមរតនកោដ្ឋ”។ 

លោក ហ៊ុន ម៉ានី បានបញ្ជាក់យ៉ាងដូច្នេះថា “ខ្ញុំសូមចូលរួមអបអរសាទរនៃការដាក់ឲ្យចរាចរនូវក្រដាសប្រាក់ប្រភេទ ៣០,០០០រៀលថ្មី។ ការសម្រេចនេះ មិនត្រឹមតែបានឆ្លុះបញ្ចាំងពីមនោសញ្ចេតនាដ៏ជ្រៀលជ្រៅរបស់កូនចៅ ចៅទួតចំពោះសម្តេចតា សម្តេចតាទួតរបស់យើងទាំងអស់គ្នាប៉ុណ្ណោះទេ ប៉ុន្តែក៏បានឆ្លុះបញ្ចាំងពីដំណើរវិវឌ្ឍប្រកបដោយភាពវិជ្ជមានរបស់សង្គមកម្ពុជា ក្នុងរយៈពេល ៣០ឆ្នាំកន្លងមកនេះ”។

សូមបញ្ជាក់ថា យោងតាមអនុក្រឹត្យរបស់រាជរដ្ឋាភិបាលកម្ពុជា ចុះហត្ថលេខាដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅថ្ងៃទី១៨ ខែតុលា ឆ្នាំ២០២១នេះ បានបញ្ជាក់ថា បានអនុញ្ញាតឲ្យចេញផ្សាយធ្វើចរាចរណ៍ និងប្រើប្រាស់ទូទាំងព្រះរាជាណាចក្រកម្ពុជា នូវធនប័ត្រ អនុស្សាវរីយ៍ប្រភេទ៣០០០០រៀល ទន្ទឹមនឹងបណ្ដាប្រភេទប្រាក់ ដែលត្រូវបានចេញផ្សាយរួចហើយ។

ការអនុញ្ញាតឲ្យចេញផ្សាយធ្វើចរាចរនូវធនប័ត្រប្រភេទ៣០០០០រៀលនេះ គឺដើម្បីអបអរសាទរ ខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស (២៣ តុលា ១៩៩១- ២៣ តុលា ២០២១) និងខួប៣០ឆ្នាំ នៃការយាងនិវត្តន៍របស់ ព្រះករុណា ព្រះបាទ សម្តេចព្រះ នរោត្តម សីហនុ ព្រះបរមរតនកោដ្ឋ មកកាន់មាតុភូមិវិញ (១៤ វិច្ឆិកា ១៩៩១ – ១៤ វិច្ឆិកា ២០២១)៕

អត្ថបទ៖ កោះកែវ