អេឡុន ម៉ាសក៍ ប្រកាសធ្វើការ ៧ ថ្ងៃ/សប្ដាហ៍ ក្រោយការលក់ Tesla ធ្លាក់ចុះគំហុក

មហាសេដ្ឋីកំពូលរបស់ពិភពលោក​ លោក អេឡុន ម៉ាសក៍ បាន​ប្រកាសត្រឡប់ទៅធ្វើការ ៧ ថ្ងៃ/សប្ដាហ៍ ចំពេលដែល​ក្រុមហ៊ុនផលិតរថយន្តអគ្គិសនី Tesla របស់​លោក ប្រឈមមុខ​នឹង​ការលក់ធ្លាក់ចុះខ្លាំងទូទាំងពិភពលោក ជាពិសេសទីផ្សារសំខាន់ៗនៅអឺរ៉ុប។

លោក ម៉ាសក៍ ដែលជា​នាយកប្រតិបត្តិក្រុមហ៊ុន​អវកាស SpaceX ផងដែរនោះ បាន​សរសេរនៅលើបណ្ដាញសង្គម X យ៉ាងដូច្នេះថា៖ «ត្រឡប់ទៅធ្វើការ ៧ ថ្ងៃ ក្នុងមួយសប្ដាហ៍ ហើយគេងនៅការិយាល័យ ប្រសិន​បើកូនៗខ្ញុំមិននៅក្បែរ»។ ក្នុងការបង្ហោះនោះ លោក​បាន​រីធ្វីត (បង្ហោះបន្ត) នូវវិដេអូសម្ភាសន៍ចាស់មួយ ដែល​លោក​បាន​លើកឡើងពីបទពិសោធន៍ធ្វើការមិនឈប់ដ៏​ឈឺចាប់។ ក្នុងវិដេអូដដែល លោក ម៉ាសក៍ បាន​និយាយថា ​ការធ្វើការ​ច្រើនម៉ោងគឺហត់នឿយទាំងផ្លូវកាយ និងចិត្ត ហើយ «ធ្វើឱ្យ​ខួរក្បាល និងបេះដូងខ្ញុំឈឺចាប់»។ ​

នេះ​មិន​មែន​ជា​លើក​ទី ១ ​ទេ​ ដែលលោក ម៉ាសក៍ បាន​និយាយ​អំពី​ទម្លាប់​ការងារ​​តឹងតែងរបស់ខ្លួន​។ នៅក្នុងបទសម្ភាសន៍កន្លងមក ​លោក ម៉ាសក៍ បាន​និយាយថា លោកធ្លាប់ធ្វើការរហូតដល់ ១២០ ម៉ោង/សប្ដាហ៍ ​ពេលដែលក្រុមហ៊ុន Tesla លំបាកក្នុងការលក់រថយន្ត Model 3 ដែលតម្រូវឱ្យលោកគេងលើការ៉ូរោងចក្រ​ជាច្រើនយប់។ ​លោកថា ពេលខ្លះ​លោក​គេង​​នៅរោងចក្រ ៣ ឆ្នាំជាប់គ្នាៗ ​ពេល​ខ្លះ​នៅលើសាឡុង ជួនកាលនៅក្រោមតុ​ធ្វើតុ ហើយពេលខ្លះក្នុងតង់លើដំបូលរោងចក្រ Tesla។

គួររំឭកថា កន្លងមក​លោក ម៉ាសក៍ បាន​បង្កការរិះគន់ចំពោះការដាក់កំហិតលើបុគ្គលិករបស់ក្រុមហ៊ុនខ្លួន និងប្រកាន់ខ្ជាប់វប្បធម៌ការងារតឹងតែង រួមទាំងការតម្រូវឱ្យ​ធ្វើការពីការិយាល័យ បើមិនដូច្នោះទេ នឹង​ត្រូវបណ្ដេញចេញ។ កាលពីដើមឆ្នាំនេះ លោក ​ម៉ាសក៍ ក៏បានលើកឡើងផងដែរថា បុគ្គលិក​នៅនាយកដ្ឋានប្រសិទ្ធភាពរដ្ឋាភិបាល (DOGE) ដែល​បង្កើតឡើងនៅអាណត្តិទី២នេះរបស់ប្រធានាធិបតីអាមេរិក ដូណាល់ ត្រាំ បាន​ធ្វើការ ១២០ ម៉ោង/សប្ដាហ៍។ ​

គេមើលឃើញថា ការនិយាយថាខ្លួន​ត្រឡប់ទៅធ្វើការ ៧ ថ្ងៃ/សប្ដាហ៍​នាពេលនេះរបស់លោក ម៉ាសក៍ ធ្វើឡើងចំពេលដែលចំណែកទីផ្សាររថយន្តអគ្គិសនី Tesla ធ្លាក់ចុះទូទាំងសកល ដោយការលក់ធ្លាក់ចុះ។ កាលពីដើមខែកក្កដា Tesla បានរាយការណ៍ថា ខ្លួនបាន​លក់រថយន្តអគ្គិសនី ៣៨៤ ១២២ គ្រឿង ទូទាំងពិភពលោក​ នៅត្រីមាសទី១ ដោយ​ធ្លាក់ចុះ ១៣,៥ ភាគរយ ធៀប​រយៈពេលដូចគ្នាឆ្នាំមុន​។​ ការលក់ភាគច្រើនធ្លាក់ចុះនៅអឺរ៉ុប ដែលជាទីផ្សារសំខាន់របស់ក្រុមហ៊ុន។

បើតាមសមាគមក្រុមហ៊ុនផលិតរថយន្តអឺរ៉ុប (ACEA) ​ការលក់ Tesla ​នៅទូទាំងសហភាពអឺរ៉ុប (EU) កាលពីខែឧសភា ​បាន​​ធ្លាក់ចុះ​ប្រមាណ ៤០,៥ ភាគរយ និងជាការធ្លាក់ចុះការលក់ប្រចាំខែ​របស់ Tesla ៥ ខែជាប់ៗគ្នា។ ​

គួរបញ្ជាក់ថា ការលក់រថយន្ត Tesla បាន​ធ្លាក់ចុះរាប់តាំងពីដើមឆ្នាំនៅតាមតំបន់ជាច្រើនទូទាំងពិភពលោក រួមទាំងអឺរ៉ុប និងចិន​ ដែលគេគូសភ្ជាប់ទៅនឹង​កត្តាច្រើនយ៉ាង រួមទាំងការជាប់ពាក់ព័ន្ធនឹង​នយោបាយអាមេរិករបស់លោក ម៉ាសក៍ ​កង្វះម៉ូដែលរថយន្តថ្មីៗ និងការប្រកួតប្រជែងកាន់​តែ​ខ្លាំងឡើងៗ ជាពិសេស​ពីក្រុមហ៊ុនចិន BYD និង SAIC Motor៕