បំផ្លាញចោលទំនិញ​ពុំមានសុវត្ថិភាព សម្រាប់អ្នកប្រើប្រាស់ជិត ៥០តោន

មន្រ្តីអគ្គនាយកដ្ឋាន ក.ប.ប. ប្រចាំរាជធានីភ្នំពេញ បានធ្វើការបំផ្លាញចោល នូវទំនិញពុំមានសុវត្ថិភាព សម្រាប់អ្នកប្រើប្រាស់ប្រមាណជិត ៥០តោន ។

ដោយទទួលបានការឯកភាពពីព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ កាលពីថ្ងៃទី៦ ខែវិច្ឆិកា ឆ្នាំ២០ ២១ មន្រ្តីអគ្គនាយកដ្ឋាន ក.ប.ប. ប្រចាំរាជធានីភ្នំពេញ បាននាំយកផលិតផលក្លែងក្លាយ មានសារធាតុពុល និងទំនិញ ខូចគុណភាពជាង ៤៩តោន ដែលមន្រ្តីសាខា ក.ប.ប. រាជធានីភ្នំពេញបង្ក្រាបបាន ក្នុងរយៈពេលកន្លងមក នៅក្នុងភូមិ សាស្ត្ររាជធានីភ្នំពេញ យកទៅបំផ្លាញចោល។

ពិធីនេះដោយមានការចូលរួម ពីមន្រ្តីនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលរាជធានីភ្នំពេញ និងអាជ្ញាធរខណ្ឌដង្កោ ផងដែរ។

ទំនិញទាំងនោះមានដូចជា៖- ផលិតផលអាល់កុលក្លែងក្លាយ ឬមេតាណុលចំនួន ៤៥ ៣៥៣លីត្រ -ស្រាស និងស្រាទំពាំងបាយជូ ដែលរឹបអូសបានក្នុងករណីពុលស្រា បណ្តាលឲ្យស្លាប់បាត់បង់ជីវិតមនុស្ស៣នាក់ នៅរាជធានីភ្នំពេញ ចំនួន ៣៤៧យួរ និង៧៦ ប៊ីដុង ស្មើ ៤ ២៧៥លីត្រ -ផលិតផលម្ហូបអាហារខូចគុណភាព ដែលរឹបអូសបានពីបណ្តាទីផ្សារ និងឃ្លាំងស្តុកទំនិញ ចំនួន ៣៥៨គីឡូក្រាម៕

អត្ថបទ៖ រ៉ាវុទ្ធ