កម្ពុជាបដិសេធយ៉ាងដាច់អហង្ការ ចំពោះអំណាចយុត្តាធិការ ហួសព្រំដែនរបស់អាមេរិក មកលើមន្ត្រីកម្ពុជា

អ្នកនាំពាក្យក្រសួងការបរទេសកម្ពុជា បានចេញសេចក្តីថ្លែងការណ៍មួយ ពាក់ព័ន្ធនឹងការដាក់ទណ្ឌកម្មរបស់អាមេរិក មកលើមន្ត្រីជាន់ខ្ពស់យោធាកម្ពុជា ២រូប កាលពីថ្ងៃពុធកន្លងទៅនេះ។ សេចក្ដីថ្លែងការណ៍ នៅថ្ងៃទី១២ ខែវិច្ឆិកា​នេះ បានលើកឡើងថា ក្រសួងការបរទេស និងសហប្រតិបត្តិការអន្តរជាតិកម្ពុជា សូមបដិសេធយ៉ាងដាច់អហង្ការ ចំពោះអំណាចយុត្តាធិការ ហួសព្រំដែនរបស់សហរដ្ឋអាមេរិក មកលើមន្ត្រីកម្ពុជា ក្រោមការចោទប្រកាន់​គ្មានមូល​ដ្ឋាន ដែលធ្វើឡើងដោយហេតុផលភូមិសាស្រ្ដនយោបាយ។

សេចក្ដីថ្លែងការណ៍ បានលើកឡើងបន្តថា យុទ្ធនាការលាបពណ៌ និងការដាក់ទណ្ឌកម្មជាឯកតោភាគី របស់សហរដ្ឋ​អាមេរិក ប្រឆាំងនឹងបុគ្គលសាធារណៈនៃរដ្ឋអធិបតេយ្យមួយ មិនត្រឹមតែបំពានលើច្បាប់អន្តរជាតិ និងបទដ្ឋានមូល​ដ្ឋាន នៃទំនាក់ទំនងអន្តរជាតិប៉ុណ្ណោះទេ។ ប៉ុន្តែបានបង្ហាញពីការមាក់ងាយទាំងស្រុង ដល់ឯករាជ្យភាព និងជាការ​ជ្រៀតជ្រែកយ៉ាងធ្ងន់ធ្ងរ ចូលកិច្ចការផ្ទៃក្នុងរបស់ប្រទេសផ្សេងទៀតផងដែរ៕