ដើមឈើរមៀលសង្កត់បុរសម្នាក់​ស្លាប់ ពេល​ឡើងកាប់​ឈើលើ​ភ្នំ

ខេត្តបាត់ដំបង៖ បុរសវ័យ៣០ឆ្នាំម្នាក់ ត្រូវបានដើមឈើដែលកាត់ផ្តួលរួចរមៀលសង្កត់ស្លាប់ ខណ:កំពុងដើរឆ្ការព្រៃនៅខាងក្រោមជំរាលភ្នំ។

ហេតុការណ៍នេះបានកើតឡើងនាថ្ងៃទី ១៣ ខែ ធ្នូ ឆ្នាំ២០២១ វេលាម៉ោង ១ រសៀល នៅ ភូមិ ភ្នំអូរច្រាប ឃុំសំឡូត  ស្រុកសំឡូត ខេត្តបាត់ដំបង។ ជនរងគ្រោះមានឈ្មោះ ផា ចណ្ណី ភេទប្រុសអាយុ ៣០ ឆ្នាំ មុខរបរធ្វើចម្ការ រស់នៅ ភូមិ សំឡូត ឃុំសំឡូត ស្រុកសំឡូត ខេត្តបាត់ដំបង។

តាមការបំភ្លឺពីឈ្មោះ នៅ សាន ភេទប្រុស អាយុ ៣០ ឆ្នាំ មុខរបរ ធ្វើចម្ការត្រូវជាបងថ្លៃជនរងគ្រោះបានរៀបរាប់ថា ពួកខ្លួនមានគ្នា៤នាក់ បានឡើងភ្នំទៅ កាន់ចំណុចខាងលើ កាលពីថ្ងៃ១២ ខែធ្នូក្នុងគោលបំណងទៅ អារឈើនៅ លើភ្នំ នៅចំនុចបេងបីកង់ ដោយបានសម្រាកមួយយប់ មិនមានបញ្ហាអ្វីឡើយ។ លុះថ្ងៃទី១៣ ប្រហែលម៉ោង៨ព្រឹក ពួកខ្លួនក៏បានកាត់ដើមឈើមួយដើមប្រវែង ៧ ម៉ែត្រ និងពុសជាពីរ អារបានប្រហែល២ម៉ែត្រ កាន់កាំបិតចុះទៅ ឆ្ការព្រៃខាងក្រោម ស្រាប់​តែឈើរមៀលទៅ តិចៗចុះទៅ ​កិន​សង្កត់លើតែម្តង។

ក្រោយពីសមត្ថកិច្ចនិងក្រុមគ្រូពេទ្យចុះពិនិត្យទៅ លើសពរួចមក ទើបបានប្រគល់ទៅ អោយស្ត្រីជាភរិយារៀបចំធ្វើបុណ្យតាមប្រពៃណីហើយ ដោយសមត្ថកិច្ចមិនអាចចុះទៅ ដល់ទីតាំងកើតហេតុបានទេព្រោះនៅ ឆ្ងាយពេក៕

អត្ថបទ៖ សោ និយមរ័ត្ន