សមត្ថកិច្ចឃាត់រថយន្តធុនធំដឹកល្មើសទម្ងន់៣គ្រឿង រក្សាទុក១ឆ្នាំ

ព្រៃវែង៖លោក ជា ម៉ូ អនុប្រធានមន្ទីរសាធារណការ និងដឹកជញ្ជូន និងជាប្រធានស្ថានីយជញ្ជីងព្រៃព្នៅនៅផ្លូវជាតិលេខ៨ បានឲ្យដឹងថា ក្រុមមន្ត្រីជញ្ជីងចល័តនៃក្រសួងសាធារណការ ដឹកនាំដោយលោក គឹម សាន់ អនុរដ្ឋលេខាធិការក្រសួងសាធារណការនិងដឹកជញ្ជូន បានចុះអនុវត្តការងារថ្លឹងរថយន្តនៅចំណុចភូមិតងឡងទី១ ឃុំព្រៃខ្លា ស្រុកស្វាយអន្ទរ ផ្លូវជាតិលេខ១១បង្គោលគីឡូ៤៧ នៅថ្ងៃទី ២១ខែធ្នូឆ្នាំ២០២១ ដោយបានថ្លឹងរថយន្តចំនួន១២គ្រឿង ក្នុងនោះ រថយន្តជាប់ពិន័យមានចំនួន ៥គ្រឿង និងជាប់រក្សាទុកមួយឆ្នាំចំនួន៣គ្រឿង (រក្សាទុកនៅស្ថានីយព្រៃព្នៅ)។

ប្រធានស្ថានីយជញ្ជីងព្រៃព្នៅនៅផ្លូវជាតិលេខ៨ បានបន្តថា ការរក្សាទុករថយន្តល្មើសទម្ងន់កំណត់រយៈពេល ១ ឆ្នាំនេះ ត្រូវធ្វើកិច្ចសន្យាឈប់ដឹកលើសកម្រិតចំនួនកំណត់បន្តទៀត ដើម្បីរក្សាផ្លូវឲ្យប្រើប្រាស់បានយូរអង្វែង។

ពាក់ព័ន្ធនឹងការចុះបង្រ្កាបរថយន្តដឹកលើសទម្ងន់កំណត់នេះ អាជ្ញាធរមានសមត្ថកិច្ច បានធ្វើការយ៉ាងយកចិត្តទុកដាក់បំផុត ដើម្បីការពារផ្លូវកុំឲ្យរងការខាតដោយសារផលប្រយោជន៍បុគ្គល និងនាំឲ្យខូចខាតសម្បត្តិរដ្ឋ៕ សៅគ្រី