អ៊ុតកៅស៊ូបេទីមបន្ថែម​ពីលើ​ផ្លូវ​បេតុង អភិិបាល​ខេត្ត​ព្រះសីហនុ ចុះទៅ​ពិនិត្យ​ផ្ទាល់

នៅ​ថ្ងៃទី០៧ ខែធ្នូ ឆ្នាំ ២០២០ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ ដឹកនាំមន្ត្រីជំនាញពាក់ព័ន្ធ ចុះពិនិត្យមើលសកម្មភាពអ៊ុតបេទីមលើផ្លូវទាំង ៣៤ខ្សែក្នុងខេត្តព្រះសីហនុ។

ឯកឧត្តម គួច ចំរើន បានធ្វើការណែនាំដល់ក្រុមហ៊ុនអ៊ុតបេទីមទាំង ០៣ ក្រុមហ៊ុន ត្រូវបំពេញការងារប្រកាន់ភ្ជាប់នូវបរិមាណគុណភាព និងសោភ័ណភាព តាមលក្ខណៈបច្ចេកទេស និងស្តង់ដារ ដើម្បីធានាការប្រើប្រាស់បានយូរអង្វែង សម្រាប់ការធ្វើដំណើររបស់បងប្អូនប្រជាពលរដ្ឋ អ្នកវិនិយោគ ភ្ញៀវទេសចរជាតិ អន្តរជាតិមកលេងកំសាន្តនៅក្នុងខេត្តព្រះសីហនុ មានភាពងាយស្រួល។

ហេដ្ឋានរចនាសម្ព័ន្ធផ្លូវក្នុងខេត្តព្រះសីហនុ​ទាំង ៣៤ ខ្សែ​ បានចាក់បេតុងរួចរាល់ ១០០ ភាគរយហើយ និងចាប់ផ្តើមអ៊ុតកៅស៊ូបេទីមកម្រាស់ ០.០៧ ម៉ែត្រ បន្ថែមពីលើបេតុងមានកម្រាស់ ០.២៥ ម៉ែត្រ។ តាម​គម្រោង​ជា​ជំហាន​ដំបូង នឹងចាប់ផ្តើម​ធ្វើការអ៊ុតបេទីមលើខ្សែផ្លូវធំៗជាមុនសិន និងបន្តទៅខ្សែផ្លូវផ្សេងទៀតតាមផែនការ សកម្មភាពរបស់ក្រុមហ៊ុននីមួយៗ។

ក្រុមហ៊ុនទាំង០៣ ដែលទទួលគម្រោងអ៊ុតបេទីមលើខ្សែផ្លូវទាំង ៣៤ខ្សែ ក្នុងក្រុងព្រះសីហនុ៖ទី១.ក្រុមហ៊ុន CCES Engineering Services Co., LTD ទទួលអ៊ុតបេទីមផ្លូវចំនួន ០៥ខ្សែ ចាប់ ផ្ដើមអ៊ុតចេញពីរង្វង់មូលព្រះសេវ: ដល់រង្វង់មូលផ្លូវបំបែកចូលមករាម ជាប់ (ផ្លូវជាតិលេខ៤)។ ២.ក្រុមហ៊ុន TCM Engineering Co., LTD ទទួលបានខ្សែផ្លូវ ១២ខ្សែ ចាប់ផ្ដើមអ៊ុតចេញពីរង្វង់មូលព្រះសេវា: ស្ថិតនៅភូមិអុង ឃុំរាម ស្រុកព្រៃនប់ ឆ្ពោះមកកាន់មហាវិថីជំទាវម៉ៅ ។ ៣.ក្រុមហ៊ុន LS Construction (Lee Service Cambodia) PTC., LTD ទទួលខ្សែផ្លូវចំនួន ១៧ខ្សែ ចាប់ផ្តើមអ៊ុតចេញពីរង្វង់មូលតោពីរទៅដល់ផ្លូវពូលូវ៉ៃ (ផ្លូវលេខ៥០០) ស្ថិតនៅក្នុងសង្កាត់លេខ៤ ក្រុងព្រះសីហនុ ។

ក្រុមហ៊ុនទាំង៣នេះ បានចាប់ផ្តើមដំណើរការអ៊ុតបេទីម ពីថៃ្ងទី ២ខែធ្ន ឆ្នាំ ២០២០ កន្លងទៅនេះ។ ការស្ថាបនាផ្លូវទាំង ៣៤ ខ្សែ ក្នុងខេត្តព្រះសីហនុ ត្រូវបានបើកការដ្ឋានសាងសង់កាលពីថ្ងៃទី១៦ ខែវិច្ឆិកា ឆ្នាំ ២០១៩៕