សន្តិសុខសង្គម

ផឹកស្រវឹងរត់ទៅយកកាំភ្លើងក្នុងរថយន្ដមកភ្ជង់បំពង់ ក គ្នាលេងរាលកៃស្លាប់ម្នាក់

បានផុស

៣ years មុន

នៅ

ថ្ងៃពុធ ៩ មីនា ២០២២

ដោយ

បុរសជាជនរងគ្រោះម្នាក់បានស្លាប់ពេលបញ្ជូនមកសង្គ្រោះបន្ទាន់នៅមន្ទីរពេទ្យរុស្ស៊ី ក្រោយពីត្រូវបុរសម្នាក់ទៀតយកកាំភ្លើងមកភ្ជង់បំពង់ ក លេង ហើយក៏រាលកៃផ្ទុះធ្លាយមកក្រោយ ខណៈកំពុងផឹកស៊ីក្នុងកម្មវិធីបង្កក់កូនអ្នកភូមិ។

ករណីនេះបានកើតឡើងកាលពីវេលាម៉ោង១១និង២៥នាទីយប់ ថ្ងៃទី០៨ ខែមីនា ឆ្នាំ២០២២ នៅចំណុចផ្ទះរបស់ឈ្មោះ សៅ អ៊ឺង ភេទប្រុស អាយុ៦០ឆ្នាំ មុខរបរកសិករ មានទីលំនៅភូមិក្រាំងទ្រា ឃុំព្រះនិពាន្វ ស្រុកគងពិសី ខេត្តកំពង់ស្ពឺ ដែលជាម្ចាស់កម្មវិធីបង្កក់កូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឲ្យដឹងថា ជនដៃដល់ក្នុងករណីនេះមានឈ្មោះ ផៃ បញ្ញា ភេទប្រុស អាយុ៣៥ឆ្នាំ មានទីលំនៅភូមិ កំពង់ទួល ឃុំអន្លង់រមៀត ស្រុកកណ្តាលស្ទឹង ខេត្តកណ្តាល។ ចំណែកជនរងគ្រោះមានឈ្មោះ អ៊ុច ភារុណ ភេទប្រុស អាយុ៣៣ឆ្នាំ មុខរបរកសិក រស់នៅភូមិអន្លង់រមៀតខាងលិច ឃុំអន្លង់រមៀត ស្រុកកណ្តាលស្ទឹង ខេត្តកណ្តាល ។

តាមប្រភពព័ត៌មានបានឲ្យដឹងថា នៅមុនពេលកើតហេតុ ខណៈកំពុងផឹកស៊ីស្រវឹងជនដៃដល់បានយកអាវុធខ្លី (មិនស្គាល់ម៉ាក) មកភ្ជង់លេង (ភ្ជង់បំពង់ ក) ជនរងគ្រោះ ហើយក៏រាលកៃផ្ទុះចំបំពង់ ក ធ្លាយមកខាងក្រោយ បណ្តាលអោយរបួសធ្ងន់។

ប្រភពបានបន្តថា បន្ទាប់ពីកើតហេតុ ជនបង្កបានលើកជនរងគ្រោះដាក់លើរថយន្តរបស់ខ្លួនដឹកបញ្ជូនទៅពេទ្យរុស្សីដើម្បីសង្គ្រោះបន្ទាន់ តែជនរងគ្រោះបានដាច់ខ្យល់ស្លាប់បាត់ទៅហើយ។ បន្ទាប់ពីជនរងគ្រោះស្លាប់ ជនបង្កត្រូវបានសន្តិសុខនៅមន្ទីរពេទ្យឃាត់ខ្លួនប្រគល់ឲ្យសមត្ថកិច្ចដើម្បីកសាងសំណុំរឿងចាត់ការតាមនីតិវិធីច្បាប់ ៕

អត្ថបទ៖ សុខុម

Related Topics:ករណីផ្ទុះអាវុធ