មិនត្រឹមតែមានសម្រស់ស្រស់ស្អាតប៉ុណ្ណោះទេ សុគន្ធ នីសា ត្រូវមហាជនហៅថា រាជិនីមនោសញ្ចេតនា

តារាចម្រៀងចាស់វស្សា អ្នកនាង សុគន្ធ នីសា ដែលគ្រប់គ្នាកោតសរសើរពីសម្រស់ និងទឹកដមសំឡេងដ៏ក្រអួនក្រអៅរហូតដល់មានមហាជនដាក់រហស្សនាមឲ្យថា ជារាជិនីមនោសញ្ចេតនាប្រចាំប្រទេស។

អ្នកនាង សុគន្ធ នីសា កើតថ្ងៃទី ១ ខែឧសភា ឆ្នាំ ១៩៨៣ នៅខេត្តក្រចេះ ហើយអ្នកនាងបានចាប់ផ្ដើមជីវិតលើវិថីសិល្បៈនៅក្នុងឆ្នាំ ២០០៣។ អស់រយៈពេលជិត ២០ ឆ្នាំ អ្នកនាង សុគន្ធ នីសា បានជ្រកក្រោមផលិតកម្មដូចជា៖ រស្មីស្ទឹងសង្កែ, ស្ប៉ាក, ហង្សមាស និងថោន។ លើសពីនេះទៅទៀត អ្នកនាងក៏ជាតារាចម្រៀងស្រីមានសមត្ថភាពសម្ដែងខ្ពស់ ជាពិសេសតួបែបកម្សត់ដែលធ្វើឲ្យមហាជនជាច្រើនកោតសរសើរពីទេពកោសល្យបូករួមជាមួយទឹកមុខដ៏ស្រទន់របស់នាង។ នៅឆ្នាំ ២០១២ អ្នកនាង សុគន្ធ នីសា ក៏បានឈ្នះពានរង្វាន់ តារាចម្រៀងមនោសញ្ចេតនា ក្នុងកម្មវិធីអាណាចក្រតារា។ទន្ទឹមនឹងនេះ សុគន្ធ នីសា ក៏បានចូលរួមសម្ដែងខ្សែភាគយន្តចំនួន ២ ដែលផ្ទុះការគាំទ្រជោគជាំនៅប៉ុស្តិ៍ទូរទស្សន៍ហង្សមាស គឺរឿង សិសិររដូវក្នុងបេះដូង នៅឆ្នាំ ២០១៧ និងរាជិនីភូមិគ្រឹះ នៅឆ្នាំ ២០១៩។

ដោយសន្ទុះនៃការគាំទ្រមិនថមថយរបស់អ្នកនាង សុគន្ធ នីសា ក្រោយរួមរស់ជាមួយផលិតកម្មថោនអស់រយៈពេល ៣ ឆ្នាំ អ្នកនាងក៏វិលត្រឡប់មកទ្រនំដើមផលិតកម្មហង្សមាស ហើយបានក្ដោបក្ដាប់តំណែងជា​គណៈកម្មការក្នុងកម្មវិធីលំដាប់ពិភពលោក The Voice Kids Cambodia រដូវកាលទី ១។ គួររំលឹកថា អ្នកនាង សុគន្ធ នីសា បានចាប់ដៃបុរសក្នុងក្ដីស្រមៃចូលរោងជ័យកាលពីថ្ងៃទី ១ ខែធ្នូ ឆ្នាំ ២០១៧ ហើយមកដល់ពេលនេះអ្នកនាងនូវមិនទាន់មានបុត្រនៅឡើយនោះទេ៕

អត្ថបទ៖ ផានិត