បទថ្មី សុគន្ធ នីសា « ចង្ហាន់បាត់គូ » ចាក់ដោតអារម្មណ៍អ្នកស្តាប់ សូម្បីតែមិនជាប់សាច់ឈាមនឹងវីរកងទ័ពពលី

« ចង្ហាន់បាត់គូ » បទចម្រៀងថ្មីរបស់រាជិនីចម្រៀងមនោសញ្ចេតនា សុគន្ធ នីសា ធ្វើឱ្យសាធារណជនពោលថាក្តុកក្តួល ស្រណោះជីវិតវីរកងទ័ពពលី ក៏ដូចជាក្រុមគ្រួសារកងទ័ព តាមរយៈអត្ថន័យពេញដោយទុក្ខសោក និងសេចក្តីនឹករលឹកដល់ឧត្តមស្វាមី ដែលបានពលីក្នុងបូរណភាពការពារដែនអធិបតេយ្យជាតិកម្ពុជាថ្មីៗនេះ។

បើតាមមតិក្នុងវីដេអូចម្រៀងមួយបទនេះ សាធារណជនភាគច្រើនដែលមិនជាប់ពាក់ព័ន្ធនឹងវីរកងទ័ពផង បានបញ្ចេញមតិក្នុងន័យតែមួយថា “ត្រឹមអ្នកដទៃ ស្ដាប់ហើយបេះដូងចុកអួល ចុះទំរាំគ្រួសារវីរកងទ័ព តើពួកគាត់ឈឺយ៉ាងណាទៅ” ។

ទន្ទឹមនឹងអត្ថន័យធ្វើឱ្យកើតក្តីរំជួលចិត្ត កវីនិពន្ធចម្រៀងមួយបទនេះ ក៏លើកឡើងផងដែរថា “ស្តាប់បទនេះហើយ សូមបងប្អូនមួយចំនួនមានស្មារតីជាតិនិយមឡើងវិញ សូមយល់ពីការឈឺចាប់ក្នុងនាមជាកូនខ្មែរតែមួយ និងគ្រួសារវីរកងទ័ពខ្មែរ ជាពិសេសការលះបង់របស់វីរកងទ័ព ភ្ជុំនេះ ទៅវត្តកុំភ្លេចឧទ្ទិសជូនដល់ដួងវិញ្ញាណក្ខន្ធវីរកងទ័ពទាំងអស់ ដែលបានពលីជីវិតក្នុងការការពារជាតិមាតុភូមិយើងបានទៅកាន់សុគតិភព”។

គួរជម្រាបថា « ចង្ហាន់បាត់គូ » ជាបទថ្មី និពន្ធទំនុកច្រៀងដោយកវីនិពន្ធឆ្នើម ស៊ិន ធារី និងនិពន្ធបទភ្លេងដោយកវីនិពន្ធ មាស សុគន្ធ ខណៈទើបតែបញ្ចេញបទនេះជាផ្លូវការកាលពីរសៀលម្សិលមិញនេះ៕