រថយន្ត​មន្ទីរសាធារណការ​ ១១ គ្រឿង​ចុះលាងសម្អាត​ផ្លូវជាតិលេខ ២

ចាប់តាំងពីព្រឹកព្រលឹមថ្ងៃទី ២៧ ខែមិថុនានេះមានរថយន្តរបស់មន្ទីរសាធារណការ​រាជធានីភ្នំពេញ​ប្រមាណ១១​គ្រឿង​ចុះលាងសម្អាតផ្លូវជាតិលេខ២​ចាប់ពីគល់ស្ពាន​អាកាស​ក្បាល​ថ្នល់​រហូតដល់ព្រំប្រទល់សង្កាត់ចាក់អង្រែ​ក្រោមក្នុងភូមិសាស្ត្រ​សង្កាត់ចាក់អង្រែ​លើ ខណ្ឌ​មានជ័យ រាជធានីភ្នំពេញ។

​លោក កែវ សាវឿន ចៅសង្កាត់ចាក់អង្រែលើ បានឱ្យដឹងថា ​ចាប់ពីព្រឹកព្រលឹម​ថ្ងៃទី២៧ ខែមិថុនា​នេះ មន្ទីរសាធារណការរាជធានីភ្នំពេញ​បានយករថយន្តលាងសំអាតផ្លូវប្រមាណ ១១ គ្រឿង ​ដោយ​ចាប់ផ្តើមពីគល់ស្ពានអាកាសក្បាលថ្នល់ដល់ព្រំប្រទល់សង្កាត់ចាក់អង្រែក្រោម ដើម្បីសម្អាតដីខ្សាច់ដែលជ្រុះលើផ្លូវ។ ហើយការដាក់រថយន្តលាងសំអាតផ្លូវនេះគឺធ្វើឡើងជារៀងរាល់សប្តាហ៍។

ក្នុងភូមិសាស្ត្រសង្កាត់ចាក់អង្រែលើ និងសង្កាត់ចាក់អង្រែក្រោមស្ថិតនៅតាមបណ្តោយផ្លូវជាតិលេខ២ខណ្ឌមានជ័យរាជធានីភ្នំពេញ មានដេប៉ូខ្សាច់មិនក្រោម១០ទីតាំងនោះទេ។ ដូច្នេះហើយទើបមានដីខ្សាច់ជ្រុះលើផ្លូវដោយសារជ្រុះពីរថយន្តដឹកខ្សាច់ចេញពីដេប៉ូទៅដាក់តាមបណ្តាការដ្ឋានកំពុងសាងសង់៕

អត្ថបទ៖ នរា