អ្នកធ្វើដំណើរឆ្លងកាត់ផ្លូវជាតិលេខ ២ នៅចំណុចសង្កាត់ចាក់អង្រែលើ ខណ្ឌមានជ័យ រាជធានីភ្នំពេញបានសំណូមពរដ៏ទទូច សុំឲ្យមន្ទីរសាធារណការរាជធានីភ្នំពេញ ជួយយកគំរបលូមកដាក់លើគំរបចាស់ដែលរងការខូចខាតផង។

លោក គុន ភិន ដែលជាមន្ត្រីរាជការមួយរូប បាននិយាយថា សព្វថ្ងៃលោកធ្វើដំណើរចេញទៅធ្វើការតាមបណ្តោយផ្លូវជាតិលេខ ២ នេះ ដោយឆ្លងកាត់មូលដ្ឋានសង្កាត់ចាក់អង្រែលើ។ ប៉ុន្តែអ្វីដែលលោកក៏ដូចជាអ្នកដំណើរដ៏ទៃទៀត មានការព្រួយបារម្មណ៍ពីគ្រោះថ្នាក់ខ្លាចជិះធ្លាក់លូ ព្រោះតែគំរបលូបានបែកសឹងគ្រប់គំរបលូ។

អ្នកធ្វើដំណើរ បាន​និយាយទៀតថា ផ្លូវជាតិលេខ ២នេះ ពីមុនមកគឺល្អស្អាតណាស់ តែបច្ចុប្បន្នរងការខូចខាតស្ទើទាំងស្រុង ដែលគេដឹងថា មកពីរថយន្តដឹកដីខ្សាច់ជាអ្នកបង្ក។ បើគំរបលូវិញ គឺរងការបែកបាក់ រហូតអ្នករស់នៅជាប់ផ្លូវយកសំកង់ ឬសម្រាស់មកដាក់ពីលើ ដើម្បីឲ្យអ្នកធ្វើដំណើរបានដឹងការ​ពារ កុំឲ្យជិះធ្លាក់លូបង្កឲ្យគ្រោះថ្នាក់។

ទាក់ទងនឹងគំរបលូ ដែលរងការខូចខាតនេះ លោក កែវ សាវឿន ចៅសង្កាត់ចាក់អង្រែលើ ធ្លាប់បានប្រាប់កម្ពុជាថ្មីផង ដែរថា តាងនាមជាអាជ្ញាធរ លោកបានធ្វើសេចក្តីរាយការណ៍ ជូនទៅសាលាខណ្ឌមានជ័យ ដើម្បីស្នើសុំទៅមន្ទីរសាធារណការរាជធានីភ្នំពេញ ដើម្បីយកគំរបលូថ្មីមកដាក់ជំនួសគំរបចាស់ ដែលរងការខូចខាត។ ប៉ុន្តែពុំដឹងថា ថ្ងៃណាទើបមន្ទីរចុះមកជួសជុលនោះឡើយ។ ដូច្នេះសូមអ្នកដំណើរមានការប្រុងប្រយ័ត្នផង៕

អត្ថបទ៖ នរា