បេឡារុស ប្តេជ្ញា គាំទ្រ រុស្ស៊ី យ៉ាងពេញទំហឹង

ប្រធានាធិបតីបេឡារុសលោក Alexander Lukashenko បាននិយាយថា ប្រទេសរបស់លោកគាំទ្ររុស្ស៊ីយ៉ាងពេញទំហឹង ក្នុងយុទ្ធនាការយោធារបស់ខ្លួននៅអ៊ុយក្រែន ហើយប្រទេសទាំងពីរនឹង បន្តឈរនៅជាមួយគ្នា។

ថ្លែងសុន្ទរកថាក្នុងពិធីរំលឹកខួបនៃការរំដោះទីក្រុង មីនស្កិ៍ ដោយកងទ័ពសូវៀតកាលពីថ្ងៃអាទិត្យទី០៣ខែកក្កដាម្សិលមិញ, លោក Lukashenko និយាយថា លោកបានបង្ហាញការគាំទ្រនៅពីក្រោយយុទ្ធនាការរបស់លោក Vladimir Putin ប្រឆាំងនឹងអ៊ុយក្រែន តាំងពីថ្ងៃដំបូងមកម្ល៉េះ។

លោកនិយាយថា “សព្វថ្ងៃនេះ យើងកំពុងត្រូវបានរិះគន់ថា ជាប្រទេសតែមួយគត់នៅក្នុងពិភពលោកដែលគាំទ្ររុស្ស៊ីក្នុងការប្រយុទ្ធប្រឆាំងនឹងពួកណាស៊ី។ យើង​គាំទ្រ ហើយ​នឹង​បន្ត​គាំទ្រ​រុស្ស៊ី។ ហើយអ្នកដែលរិះគន់យើង តើពួកគេមិនដឹងទេឬថា យើងមានសម្ព័ន្ធភាពជិតស្និទ្ធបែបនេះជាមួយសហព័ន្ធរុស្ស៊ី និងមានកងទ័ពបង្រួបបង្រួមជាមួយគ្នា?។ ប៉ុន្តែអ្នកបានដឹងរឿងទាំងអស់នេះហើយ។ យើងនឹងនៅជាមួយគ្នាជាមួយរុស្ស៊ី ក្នុងនាមជាបងប្អូន”។

គួរបញ្ជាក់ថា ប្រទេសបេឡារុសបានប្តេជ្ញាចិត្តចំពោះ “រដ្ឋសហជីព” ជាមួយរុស្ស៊ីតាំងពីទសវត្សរ៍ឆ្នាំ១៩៩០មកម្ល៉េះ ប៉ុន្តែមានការរីកចម្រើនតិចតួចណាស់ លើការអនុវត្តផែនការនេះ ហើយកាលពីឆ្នាំមុន លោក Lukashenko បានទទូចថា ប្រទេសរបស់លោក ត្រូវតែរក្សា “អធិបតេយ្យភាព” របស់ខ្លួន៕

ប្រែសម្រួល៖ Vann Vann

ប្រភព៖ Sky

ចុចអាន៖ សម្ព័ន្ធមិត្តលោក ពូទីន ទាមទារឲ្យសងសឹក បន្ទាប់ពីការផ្ទុះនៅព្រំដែន រុស្ស៊ី