សមាគមមើលឃើញអំពីកំណើនទេសចរពេលភ្ជុំបិណ្ឌក្រោយកម្ពុជាមានលក្ខខណ្ឌអំណោយផលជាច្រើន

ប្រធាន​​សមាគម​ទីភ្នាក់ងារ​​ទេសចរណ៍​​កម្ពុជា លោកស្រី ឆាយ ស៊ីវលីន បានលើកឡើងថា នៅក្នុងរដូវកាល​ពិធីបុណ្យភ្ជុំបិណ្ឌ​ប្រពៃណីជាតិខ្មែរ កម្ពុជា នឹងមានកំណើនភ្ញៀវទេសចរជាតិ ខណៈទេសចរអន្តរជាតិអាចកើនដែរ តែមិនដូចភ្ញៀវក្នុងស្រុកនោះទេ។

លោកស្រី ឆាយ ស៊ីវលីន អះអាងដូចនេះ ដោយមើលឃើញថា កម្ពុជា បានចាក់វ៉ាក់សាំងជូនពលរដ្ឋច្រើន និងប្រទេសបានបើកទូលាយ ជាពិសេសនៅពេលមាន​បុណ្យទាននៅតាមរមណីយដ្ឋាននានា បានខិតខំកែច្នៃ និងរៀបចំសណ្ឋាប់ធ្នាប់ សន្តិសុខវត្ថិភាពល្អជាដើម។ «ទំនោររបស់ប្រជាពលរដ្ឋយើង នៅពេលមានបុណ្យទានម្តងៗ តែងតែចេញដើរកម្សាន្តហើយ»។ នេះជាការបន្ថែមរបស់លោក ស្រី ឆាយ ស៊ីវលីន។

ប្រធាន​​សមាគម​ទីភ្នាក់ងារ​​ទេសចរណ៍​​កម្ពុជា បានបន្តថា ​ប៉ែកខាងសមុទ្រ និងតំបន់អេកូទេសចរណ៍ នឹងទាក់ទាញភ្ញៀវ​ទេសចរឱ្យទៅកម្សាន្តច្រើន។ ជាមួយគ្នានេះ តំបន់ទេសចរណ៍វប្បធម៌ នៅខេត្តសៀមរាប ក៏នឹងអាចទាក់ទាញភ្ញៀវបាន​ច្រើនផងដែរ។ លោកស្រី ឆាយ ស៊ីវលីន បានគូសបញ្ជាក់ថា អាជ្ញាធរខេត្តសៀមរាប បានខិតខំធ្វើការកិច្ចការងារជាច្រើន ដើម្បីទាក់ទាញវិស័យទេសចរណ៍នេះ ដូចជា ការជំរុញឱ្យមានការងើបឡើងវិញនូវអាជីវកម្មទេសចរណ៍ ការរៀបចំ​ហេដ្ឋារចនា​សម្ព័ន្ធផ្លូវថ្នល់បានល្អប្រសើរ ការបញ្ចុះតម្លៃសេវាទេសចរណ៍ផ្សេងៗ ជាពិសេសសម្រួលដល់ភ្ញៀវជនបរទេស ដែលរស់នៅកម្ពុជា ២ឆ្នាំ ទទួលបានការលើកទឹកចិត្តអាចចូលលេងតំបន់អង្គរដោយមិនគិតថ្លៃ ជាដើម។

«ចំណែកខេត្តដែលពីមុនមក មិនសូវទទួលបានភ្ញៀវទេសចរច្រើន ចាប់ពីពេលនេះទៅនឹងអាចមានការកើនឡើងហើយ ដោយសារភ្ញៀវក្នុងស្រុកមួយចំនួនធំ បានដើរកម្សាន្តកន្លែងដែលល្បីៗរួចហើយ ដូច្នេះ នៅគោលទៅទេសចរណ៍មួយ​ចំនួនទៀត ដែលពួកគេមិនទាន់បានទៅដល់ គេនឹងទៅលេងនៅពិធីបុណ្យភ្ជុំបិណ្ឌ ដែលជាថ្ងៃឈប់សម្រាកនេះ»។ នេះជាការកត់សម្គាល់របស់លោកស្រី ឆាយ ស៊ីវលីន។

​​លោកស្រី ក៏បានអំពាវនាវដល់ប្រតិបត្តិករទេសចរជាពិសេសវិស័យសណ្ឋាគារ ដែលជាសេវាកម្មដ៏សំខាន់ មានឱកាសស្រូប​ចំណូលមកវិញតាមរយៈទេសចរក្នុងស្រុក នៅក្នុងពិធីបុណ្យភ្ជុំបិណ្ឌ ត្រូវរៀបចំគុណភាពសេវាកម្ម ដោយពង្រឹងធនធានមនុស្សក្នុងវិស័យនេះឱ្យបានល្អ។

យោងតាមរបាយការណ៍របស់ក្រសួងទេសចរណ៍ បានបង្ហាញថា រយៈពេល ៣ថ្ងៃ នៃពិធីបុណ្យភ្ជុំបិណ្ឌ កាលពីឆ្នាំ ២០២១ មានភ្ញៀវទេសចរប្រមាណ ៦៦ម៉ឺននាក់ បានធ្វើដំណើរកម្សាន្ត នៅតាមតំបន់រមណីយដ្ឋាននានាទូទាំងប្រទេស។ ដោយឡែកឆ្នាំនេះ អ្នកជំនាញទេសចរណ៍មើលឃើញថា នឹងកើនឡើងខ្ពស់ជាងឆ្នាំ ២០២១។

សូមបញ្ជាក់ថា ពិធីបុណ្យភ្ជុំបិណ្ឌប្រពៃណីជាតិខ្មែរ ឆ្នាំ ២០២២នេះ នឹងប្រព្រឹត្តិទៅ ថ្ងៃទី ២៤-២៦ ខែ កញ្ញា ដោយចាប់ផ្តើមដាក់បិណ្ឌ នៅថ្ងៃទី ១១ ខែកញ្ញា គឺជាបិណ្ឌ១៕