ព័ត៌មានជាតិ

ខេត្តសៀមរាបសង្ឃឹមថានឹងក្លាយជាគោលដៅទេសចរណ៍សំខាន់មួយសម្រាប់ប្រជាជនអារ៉ាប់

បានផុស

៥ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

អភិបាលរងខេត្តសៀមរាបលោក ង៉ូវ សេងកាក់ ថាខេត្តបានរៀបចំក្នុងការបង្កើតកញ្ចប់ទេសចរណ៍កម្រិតខ្ពស់ដើម្បីឆ្លើយតបនឹងតម្រូវការរបស់ភ្ញៀវទេសចរជាតិអារ៉ាប់ និងសង្ឃឹមថាតាមរយៈការបង្កើតទំនាក់ទំនងរវាងភ្នាក់ងារទេសចរណ៍កម្ពុជា និងក្រុមហ៊ុនធំៗនៅប្រទេសតំបន់អារ៉ាប់នឹងអាចធ្វើឱ្យសៀមរាបក្លាយជាគោលដៅទេសចរណ៍សំខាន់មួយសម្រាប់ប្រជាជនតំបន់នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបជាមួយនាយិកាប្រតិបត្តិនៃក្រុមហ៊ុន Dubai Amirakletour និងជាតំណាងមជ្ឈមណ្ឌលពាណិជ្ជកម្មការងារឌូបៃប្រចាំកម្ពុជាលោកស្រី ម៉ាត់ អាមីរ៉ស់ កាលពីថ្ងៃទី១៧ ខែកុម្ភៈ ឆ្នាំ២០២៦ លោក ង៉ូវ សេងកាក់ បានលើកឡើងថា ការបង្កើតកញ្ចប់ទេសចរណ៍កម្រិតខ្ពស់ (Luxury Package) នៅខេត្តសៀមរាបគឺដើម្បីឆ្លើយតបទៅនឹងតម្រូវការរបស់ភ្ញៀវទេសចរអារ៉ាប់ដែលនិយមសេវាកម្មប្រណីត និងស្នាក់នៅលំដាប់ផ្កាយប្រាំ ហើយលោកសង្ឃឹមថាខេត្តសៀមរាបនឹងក្លាយជាគោលដៅទេសចរណ៍លំដាប់កំពូលសម្រាប់ពលរដ្ឋក្នុងតំបន់មជ្ឈិមបូព៌ាក្នុងពេលឆាប់ៗខាងមុខ។

តំណាងមជ្ឈមណ្ឌលពាណិជ្ជកម្មការងារឌូបៃប្រចាំកម្ពុជាលោកស្រី ម៉ាត់ អាមីរ៉ស់ ក៏បានលើកឡើងដែរថា ខេត្តសៀមរាបមានសក្ដានុពលសំខាន់ដែលអាចជាជម្រើសក្នុងការវិនិយោគពីតំបន់មជ្ឈិមបូព៌ា ដោយថាការបង្កើតទំនាក់ទំនងរវាងទេសចរណ៍សៀមរាប និងក្រុមហ៊ុនធំៗនៅឌូបៃ នឹងក្លាយជាយន្តការប្ដូរវេនភ្ញៀវទៅវិញទៅមក ដែលជាច្រកដ៏សំខាន់សម្រាប់ទាក់ទាញវិនិយោគិនពីតំបន់នេះមកកម្ពុជា ដែលនឹងក្លាយជាចំណែកនៃការជំរុញកំណើនសេដ្ឋកិច្ចជាតិឱ្យកាន់តែរឹងមាំ។

គួរជម្រាបថា បើទោះបីជាបច្ចុប្បន្ន ចំនួនភ្ញៀវទេសចរពីតំបន់មជ្ឈិមបូព៌ាមកកម្ពុជានៅមានកម្រិតនៅឡើយដោយរបាយការណ៍ឆ្នាំ២០២៥ បង្ហាញថាមានចំនួនប្រមាណ ៣,៥០០នាក់ក៏ដោយ ប៉ុន្តែសញ្ញាវិជ្ជមានបានលេចឡើងតាមរយៈការបង្កើនទំនាក់ទំនងយ៉ាងជិតស្និទ្ធនាពេលចុងក្រោយនេះ។ អ្នកវិភាគយល់ឃើញថា ការពង្រីកគោលដៅទាក់ទាញអ្នកវិនិយោគ និងទេសចរពីតំបន់អារ៉ាប់ គឺជាយុទ្ធសាស្ត្រដ៏ត្រឹមត្រូវក្នុងការធ្វើពិពិធកម្មទីផ្សារទេសចរណ៍កម្ពុជាឱ្យកាន់តែរីកចម្រើន៕

អត្ថបទដោយ ហ៊ុន សិរីវឌ្ឍន៍