អាជ្ញាធរខេត្តកំពត​ ផ្តោត​ការ​យក​ចិត្ត​ទុក​ដាក់​រៀប​ចំ​អភិវឌ្ឍន៍សហគមន៍ទេសចរណ៍​ឱ្យ​ទាក់ទាញ​ជាងមុន

កំពត ៖ នៅថ្ងៃទី ២៨ ខែមករា ឆ្នាំ២០២៦នេះ លោក គង់ ប៊ុនរា ចៅ​សង្កាត់ព្រែកត្នោត បានប្រាប់​ឱ្យដឹងថា ក្នុង​មួយ​រយៈ​ពេល​កន្លងមកនេះ បើ​ទោះ​ជា​ចំនួនភ្ញៀវទេសចរ​ទៅ​លេង​នៅ​តំបន់​សហគមន៍អេកូទេសចរណ៍ធ្លាក់ចុះ ដោយសារបញ្ហាជម្លោះព្រំដែនជាមួយថៃក៏ដោយ តែ​សកម្មភាព​អភិវឌ្ឍន៍​របស់អាជ្ញាធរខេត្ត មន្ត្រីជំនាញពាក់ព័ន្ធ និងអង្គការដៃគូមិនបានបន្ធូរដៃទេ។

ក្នុងនោះសហគមន៍ព្រែកត្នោត ក្រុងបូកគោ ទាំងថ្នាក់ដឹកនាំ មន្ត្រីជំនាញ អាជ្ញធរ និងអង្គការដៃគូរបាន និងកំពុងរួមគ្នាខិតខំរៀបចំអភិរក្ស និងអភិវឌ្ឍន៍​ឱ្យកាន់តែប្រសើរនិងទាក់ទាញជាងមុន។

ប្រធានសហគមន៍នេសាទព្រែកត្នោត ស្ថិតនៅសង្កាត់ព្រែកត្នោត ក្រុងបូកគោ ខេត្តកំពត លោក អ៊ុក សុវណ្ណរិទ្ធ បានប្រាប់ឲ្យដឹងថា  បន្ទាប់ពីមានបញ្ហាជម្លោះព្រំដែនរវាងកម្ពុជានិងថៃ ចំនួនភ្ញៀវមកលេងបានធ្លាក់ចុះ។

ប៉ុន្តែក្រុមការងាររាជរដ្ឋាភិបាលចុះមូលដ្ឋានខេត្តកំពត ពិសេសឯកឧត្តមអភិបាលខេត្ត មន្ត្រីជំនាញ និងអង្គការដៃគូ រិតតែផ្តោតការយកចិត្តទុកដាក់ ក្នុងការរៀបចំអភិរក្ស និង​អភិវឌ្ឍន៍​សហគមន៍ខ្លាំងជាងមុន។

កញ្ញា ទុំ សុភាព នាយរងខណ្ឌរដ្ឋាបាលជលផលខេត្តកំពត បានឱ្យដឹងថា មន្ត្រីជំនាញ​បានសហការជាមួយអាជ្ញាធរ និងអង្គការដៃគូ រៀបចំវគ្គបណ្តុះបណ្តាល ដើម្បីជំរុញ​លើក​ទឹកចិត្តប្រជាសហគមន៍ឲ្យពង្រឹងការធ្វើវរីវប្បកម្មផ្សេងៗ ដើម្បីទាក់ទាញភ្ញៀវមកមើលកម្សាន្តផង និងសម្រាប់លក់ទៅទីផ្សារដើម្បីផ្គត់ផ្គង់តម្រូវការប្រើប្រាស់ក្នុងស្រុកផង។

លោក គង់ ប៊ុនរា ចៅសង្កាត់ព្រែកត្នោត បានបញ្ជាក់ដែរថា សម្រាប់ឆ្នាំ២០២៦នេះ អាជ្ញាធរសង្កាត់មានកញ្ចប់ថវិកាមួយចំនួន ដើម្បីជួយជ្រោមជ្រែងដល់ការងារអភិរក្ស និងអភិវឌ្ឍន៍សហគមន៍ឲ្យកាន់តែមានភាពល្អប្រសើរ ឆ្លើយតបតាមការចង់បាន របស់ពលរដ្ឋ និងភ្ញៀវទេសចរ។

សូមបញ្ជាក់ថា ដោយមានការយកចិត្ត​ទុកដាក់​ពី​លោក​ឧបនាយករដ្ឋមន្ត្រី សាយ សំអាល់ ប្រធាន​ក្រុម​ការងារ​រាជរដ្ឋាភិបាល​ចុះ​មូលដ្ឋាន​ខេត្តកំពត និង​លោក​បណ្ឌិត ម៉ៅ ធនិន អភិបាលខេត្តកំពត  គ្រប់សហគមន៍នេសាទទាំងអស់ ទទួលបានការលើកទឹកចិត្ត និងជួយ​ឧបត្ថម្ភ​គាំទ្រ​ដើម្បី​រៀបចំ​ហេដ្ឋារចនាសម្ព័ន្ធ​រូបវ័ន្ត​ផ្សេងៗ មាន​ចំណត បន្ទប់ទឹក ផ្លូវ ទឹកស្អាត និងភ្លើង​ប្រើប្រាស់ជាដើម ដើម្បី​បម្រើ​ដល់​វិស័យទេសចរណ៍ ក្នុង​បំណង​បង្កើន​ប្រាក់​ចំណូល​ជូន​ដល់​ប្រជាពលរដ្ឋ​ក្នុង​មូលដ្ឋានបន្ថែម៕

ដោយ ៖ សឹង រ៉ាត់