មឈូសមហាក្សត្រិយានី Elizabeth ទី២ មកដល់ព្រះរាជដំណាក់ទ្រង់ហើយ

យានដែលដឹកមឈូសរបស់មហាក្សត្រិយានី Elizabeth ទី២ របស់ចក្រភពអង់គ្លេសបានមកដល់វិមាន Balmoral ក្នុងរាជធានី Edinburgh ហើយកាលពីថ្ងៃអាទិត្យ ដែលជាព្រះរាជដំណាក់រដូវក្តៅរបស់ព្រះមហាក្សត្រិយានីក្នុងប្រទេសស្កុតឡេន បន្ទាប់ពីព្រះនាងបានសោយទិវង្គតនៅទីនោះកាលពីថ្ងៃព្រហស្បតិ៍ ក្នុងជន្មាយុ ៩៦ ព្រះវស្សា ។

មឈូសរបស់ព្រះនាងត្រូវបានគ្របដណ្ដប់ដោយទង់ជាតិព្រះរាជវាំងស្កុតឡេន អមដោយកម្រងផ្កាដែលព្រះមហាក្សត្រិយានីសព្វព្រះរាជហឫទ័យកាលនៅមានព្រះជន្ម ខណៈអ្នកកាន់ទុក្ខក៏បានតម្រង់ជួរតាមផ្លូវនៃក្បួនដង្ហែរដើម្បីឧទ្ទិសដល់ព្រះមហាក្សត្រិយានីសម្រាប់ការគ្រងរាជបល្ល័ង្ករយៈពេល ៧០ ឆ្នាំរបស់ព្រះនាងផងដែរ ។

បន្ទាប់មកក្បួនដង្ហែរបស់ព្រះមហាក្សត្រិយានីបានទៅដល់វិមាន Holyroodhouse ក្នុងទីក្រុង Edinburgh ខណៈទាហាន​ក្នុងឯកសណ្ឋាន​ប្រពៃណី​​បាន​យក​មឈូស​របស់ព្រះនាង​ចូល​ក្នុងព្រះរាជ​វាំង​ដែល​ជាព្រះរាជដំណាក់​របស់ព្រះ​នាង​ក្នុង​ប្រទេស​ស្កុតឡេន ។

ទន្ទឹមនោះ មឈូសរបស់ព្រះនាងក៏នឹងយកចេញពីវិមាន Holyroodhouse ទៅវិហារ St Giles នៅថ្ងៃចន្ទនេះដើម្បី​ឲ្យ​សាធារណជន​ចូល​គោរពព្រះ​វិញ្ញាណក្ខន្ធ​ក្នុងរយៈពេល ២៤ ម៉ោង ។

បន្ទាប់មក មឈូសនឹងត្រូវហោះហើរទៅកាន់ទីក្រុងឡុងដ៍របស់អង់គ្លេសតាមយន្តហោះ Royal Air Force នៅថ្ងៃអង្គារ មុនពេលត្រូវបានផ្ទេរទៅសាល Westminster Hall នៅថ្ងៃបន្ទាប់ ។

នៅទីនោះមឈូសរបស់ព្រះមហាក្សត្រិយានីនឹងដាក់តម្កល់រយៈពេល ៤ ថ្ងៃដើម្បីអនុញ្ញាតឲ្យសាធារណជនចូលគោរពព្រះវិញ្ញាណក្ខន្ធចុងក្រោយរបស់ពួកគេ ហើយព្រះរាពិធីបុណ្យសពរដ្ឋរបស់ព្រះនាងនឹងប្រព្រឹត្តទៅនៅថ្ងៃទី ១៩ ខែកញ្ញា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ការសិក្សាថ្មី ៖ ផែនដីកំពុងស្ថិតក្នុងហានិភ័យ ៤ ចំណុច អាចជាមហន្តរាយ​សម្រាប់មនុស្សជុំវិញពិភពលោក