អធិការនគរបាលស្រុកចន្ទ្រាដឹកនាំកម្លាំងចាក់ថ្មមិចបំពេញជង្ហុកផ្លូវ សម្រួលដល់ការធ្វើ​ដំណើររបស់ពលរដ្ឋ

(ខេត្តស្វាយរៀង)៖ ដោយមើលឃើញនូវការលំបាករបស់បងប្អូនប្រជាពលរដ្ឋដែលធ្វើដំណើរឆ្លង​កាត់តាមផ្លូវខាងមុខ​អធិការដ្ឋានគរបាលស្រុកចន្ទ្រា ព្រោះតែផ្លូវនេះបានរងនូវការខូចខាតជាអន្លើៗ និងមានជង្ហុកធំៗងាយបង្កគ្រោះថ្នាក់ដល់​ពលរដ្ឋ​ក៏ដូចជា​អ្នកដែលធ្វើដំណើរឆ្លងកាត់តាមផ្លូវមួយនេះ នៅរសៀលថ្ងៃទី១៩ ខែកញ្ញា ឆ្នាំ២០២២ លោកវរៈ​សេនីយ៍ទោ ជិន សុភឿន អធិការនៃអធិការដ្ឋាននគរបាលស្រុកចន្ទ្រា បានដឹកនាំកម្លាំង ធ្វើការកាយផ្លូវចាក់ថ្មមិច​លុបជង្ហុកធំៗដែលបានបែកខូចបង្កដោយរថយន្តធំ ដើម្បីឱ្យប្រជាពលរដ្ឋងាយស្រួលធ្វើដំណើរប្រកបមុខរបររកស៊ី និងបញ្ជៀសគ្រោះថ្នាក់ចរាចរណ៍ជាដើម។

លោកវរសេនីយ៍ទោ ជិន សុភឿន បានលើកឡើងថា ការចាក់ថ្មមិចលុបជង្ហុកដែលបែកខូចនាពេលនេះក៏បាន​ជួយសម្រួល​ក្នុងការធ្វើដំណើរ​ទៅមកក្នុងឱកាសរដូវបុណ្យទានរបស់បងប្អូនប្រជាពលរដ្ឋនៅរដូវភ្ជុំបិណ្ឌ និងការដឹកកសិផលមកកាន់ទីផ្សារ។

លោកអធិការក៏បានអំពាវនាវដល់បងប្អូនប្រជាពលរដ្ឋទាំងអស់ ឱ្យមានការប្រុងប្រយ័ត្នខ្ពស់ក្នុងការធ្វើដំណើរ និងត្រូវគោរពច្បាប់ចរាចរណ៍ កុំបើកបរលឿនហួសកំណត់ក្នុងទីប្រជុំជន នាំឱ្យបង្កគ្រោះចរាចរណ៍៕ ដោយ:ភក្ដី