លោក Zelensky នឹងអនុញ្ញាតឲ្យថ្លែងសុន្ទរកថាក្នុងកិច្ចប្រជុំ G20 នៅ ឥណ្ឌូណេស៊ី

ប្រធានាធិបតីអ៊ុយក្រែនលោក Volodymyr Zelensky បានបញ្ជាក់ពីការចូលរួមរបស់គាត់នៅក្នុងកិច្ចប្រជុំកំពូល G20 ដែលប្រទេសឥណ្ឌូណេស៊ីធ្វើជាម្ចាស់ផ្ទះ នាពេលខាងមុខ តាមរយៈការថ្លែងសុន្ទរកថាក្នុងវីដេអូ ។

លោក Zelensky បាននិយាយនៅក្នុងវីដេអូមួយដែលបង្ហោះលើបណ្ដាញ Twitter ថា “យើងកំពុងរៀបចំយ៉ាងសកម្មនូវសុន្ទរកថាដែលត្រូវថ្លែងនៅក្នុងកិច្ចប្រជុំ G20 ។ វាជាសប្ដាហ៍ដ៏សំខាន់ និងជាសប្តាហ៍ការទូតសម្រាប់អ៊ុយក្រែន ។ កិច្ចប្រជុំកំពូល G20 នឹងធ្វើឡើងនៅក្នុងប្រទេសឥណ្ឌូណេស៊ី ហើយជំហររបស់យើងនឹងត្រូវបានបង្ហាញនៅក្នុងកិច្ចប្រជុំនោះ” ។

ប្រទេសឥណ្ឌូណេស៊ី នឹងធ្វើជាម្ចាស់ផ្ទះនៃកិច្ចប្រជុំកំពូល G20 នៅកោះបាលី ចាប់ពីថ្ងៃទី ១៥-១៦ ខែវិច្ឆិកា ខណៈកាលពីថ្ងៃព្រហស្បតិ៍ វិមានក្រឹមឡាំងបាននិយាយថា ប្រធានាធិបតីរុស្ស៊ីលោក វ្ល៉ាឌីមៀរ ពូទីន នឹងមិនចូលរួមកិច្ចប្រជុំកំពូលនេះនោះទេ ហើយគណៈប្រតិភូរុស្ស៊ីនឹងត្រូវដឹកនាំដោយរដ្ឋមន្ត្រីការបរទេសលោក Sergey Lavrov ។

គណៈប្រតិភូរុស្ស៊ីបានមកដល់កោះបាលីកាលពីព្រឹកថ្ងៃអាទិត្យ ខណៈមុនពេលមកដល់ ក្រសួងការបរទេសរុស្ស៊ីបាននិយាយថា ការពង្រីករបៀបវារៈនៃ G20 ដោយរួមបញ្ចូលបញ្ហាសន្តិភាព និងសន្តិសុខគឺ “មិនអាចទទួលយកបាន” នោះទេ ហើយវាក៏ជាការបង្កើតការញុះញង់ចូលទៅក្នុងដែននៃក្រុមប្រឹក្សាសន្តិសុខអង្គការសហប្រជាជាតិផងដែរ .

ស្របពេលជាមួយគ្នានេះ មេដឹកនាំពិភពលោកក៏នឹងមិនចូលរួមក្នុង “ការថតរូបគ្រួសារ” ជាផ្លូវការផងដែរ​ នៅពេលជួបគ្នាក្នុងកិច្ចប្រជុំកំពូល G20 នេះ ដោយសារតែការមិនពេញចិត្តចំពោះវត្តមានរបស់រុស្ស៊ីនៅឯកិច្ចប្រជុំកំពូលនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មេដឹកនាំពិភពលោក នឹងមិនថតរូបជុំគ្នាទេ ក្នុងកិច្ចប្រជុំកំពូល G20 នៅ ឥណ្ឌូណេស៊ី