រដ្ឋមន្ត្រីអប់រំ វាយតម្លៃខ្ពស់ចំពោះដៃគូអភិវឌ្ឍ បានជួយគាំទ្រដល់កម្ពុជាក្នុងវិស័យអប់រំ

បណ្ឌិតសាភាចារ្យ ហង់ជួន ណារ៉ុន វាយតម្លៃខ្ពស់ចំពោះដៃគូអភិវឌ្ឍទាំងអស់ ជាពិសេសភាពជាដៃគូសម្រាប់ការអប់រំ ដែលបានជួយគាំទ្រដល់កម្ពុជាក្នុងវិស័យអប់រំ ដែលជាវិស័យមួយមានវិសាលភាពធំធេង ស្ថិតនៅក្រោមការគ្រប់គ្រង របស់ក្រសួងអប់រំ យុវជន និងកីឡា ក្រោមឆត្រនៃផែនការ យុទ្ធសាស្ត្រវិស័យអប់រំ និងការធ្វើកំណែទម្រង់វិស័យអប់រំគ្រប់កម្រិត ទទួលបានលទ្ធផលជាបន្តបន្ទាប់។

អគ្គនាយកដ្ឋានគោលនយោបាយ និងផែនការ នៃក្រសួងអប់រំ យុវជន និងកីឡា សហការជាមួយដៃគូអភិវឌ្ឍន៍គម្រោង បានរៀបចំសិក្ខាសាលាស្ដីពី “ការផ្សព្វផ្សាយលទ្ធផល និង ឧត្តមានុវត្តន៍កម្មវិធីភាពជាដៃគូ សកលសម្រាប់ការអប់រំដំណាក់កាលទី៣ (GPE-3)” ក្រោមអធិបតីភាព បណ្ឌិតសាភាចារ្យ ហងជួន ណារ៉ុន រដ្ឋមន្ត្រី ក្រសួងអប់រំ យុវជន និងកីឡា ដោយមានការចូលរួមពីថ្នាក់ដឹកនាំ និងមន្ត្រីក្រសួងអប់រំ យុវជន និងកីឡា សមាជិកក្រុមការងារ GPE-3 ដៃគូអភិវឌ្ឍនានា នាយកវិទ្យាស្ថានគរុកោសល្យ នាយកសាលាគរុកោសល្យ នាយកសាលា និងគ្រូបង្រៀនបឋមសិក្សាមកពីរាជធានី-ខេត្ត នៅថ្ងៃទី១៧ ខែវិច្ឆិកា ឆ្នាំ២០២២នេះ។

បណ្ឌិតសាភាចារ្យ រដ្ឋមន្ត្រី បានថ្លែងអំណរគុណចំពោះ ដៃគូអភិវឌ្ឍទាំងអស់ ដែលបានសហការគ្នាយ៉ាងជិតស្និតអនុវត្តនូវគម្រោងទាំងមូល ហើយភាពជាដៃគូសាកលសម្រាប់ការអប់រំ (GPE) នេះ ត្រូវបានប្រើប្រាស់សម្រាប់អនុវត្តផ្នែកផ្សេងៗ នៃកំណែទម្រង់សាលារៀន កំណែទម្រង់ការគ្រប់គ្រងបុគ្គលិក កំណែទម្រង់មុខងារសាធារណៈ ក៏ដូចជាកំណែទម្រង់សាលាគរុកោសល្យ។

គួរបញ្ជាក់ថា កម្មវិធីមូលនិធិភាពជាដៃគូសកលសម្រាប់ការអប់រំ ដំណាក់កាលទី៣ (GPE3) ជាហិរញ្ញប្បទានឥតសំណងពហុភាគីដែលកម្ពុជាទទួលបាន។ GPE3 ផ្ដោតលើការអភិវឌ្ឍហេដ្ឋារចនាសម្ព័ន្ធ និងគ្រូឧទ្ទេស និងពង្រឹងសមត្ថភាពគ្រូបង្រៀន ដែលអនុវត្តតាំងពីឆ្នាំ២០១៨ ដល់ឆ្នាំ២០២២៕