ប្រទេសសម្ព័ន្ធមិត្តរុស្ស៊ី អនុម័តច្បាប់ ដែលនឹងឈានទៅដាក់ទោសប្រហារជីវិត ជនក្បត់ជាតិ (មានវីដេអូ)

សភាបេឡារុសកាលពីថ្ងៃពុធទី០៧ខែធ្នូ បានអនុម័តច្បាប់មួយដែលនឹងដាក់ចេញនូវទោសប្រហារជីវិត សម្រាប់មន្ត្រីរដ្ឋការ និងសមាជិកនៃយោធារបស់ប្រទេស ដែលត្រូវបានរកឃើញថាមានទោសពីបទក្បត់ជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សភាបេឡារុសបាននិយាយនៅក្នុងសេចក្តីថ្លែងការណ៍មួយថា ការដាក់ទណ្ឌកម្មដ៏មានសក្តានុពលសម្រាប់បទល្មើសនេះ ត្រូវបានរៀបចំឡើងដើម្បីដាក់ឥទ្ធិពល រារាំងដល់សកម្មភាពបំផ្លិចបំផ្លាញ​ ក៏ដូចជាបង្ហាញពីការប្រយុទ្ធប្រឆាំងនឹងអំពើក្បត់ជាតិផងដែរ។ 

ច្បាប់​នេះ​ក៏​កើត​ឡើង​ផងដែរ ចំពេល​​រដ្ឋាភិបាលកំពុងខិតខំប្រឹងប្រែង ​ចាត់​វិធាន​ការ​បង្ការ​ដើម្បី​ប្រយុទ្ធ​ប្រឆាំង​នឹង​ភាពជ្រុលនិយមនិង​អំពើ​ភេរវកម្ម។

យោងតាមច្បាប់របស់ប្រទេសបេឡារុសនាពេលបច្ចុប្បន្ននេះ ការប្រព្រឹត្តអំពើក្បត់ជាតិ ផ្តល់តែការជាប់ពន្ធនាគាររយៈពេលវែងប៉ុណ្ណោះ។ ប្រជាពលរដ្ឋសាមញ្ញដែលត្រូវបានរកឃើញថាមានពិរុទ្ធនៃឧក្រិដ្ឋកម្មនេះ នឹងត្រូវជាប់ពន្ធនាគារពី៧ទៅ១៥ឆ្នាំ ចំណែកមន្ត្រីរដ្ឋការ ត្រូវប្រឈមនឹងការជាប់ពន្ធនាគារពី១០ទៅ២០ឆ្នាំ។

កាលពីដើមឆ្នាំនេះ ទីក្រុង មីនស្កិ៍ ក៏បានណែនាំទោសប្រហារជីវិតសម្រាប់អំពើភេរវកម្មផងដែរ។ ឥឡូវ អ្នកដែលត្រូវបានគេរកឃើញថាមានពិរុទ្ធពីបទ “ប៉ុនប៉ងភេរវកម្ម” ក៏ដូចជាការរៀបចំគម្រោងធ្វើឃាតមន្ត្រីរដ្ឋ ឬបុគ្គលសាធារណៈលេចធ្លោ ក៏ត្រូវប្រឈមមុខនឹងការផ្តន្ទាទោស ធ្ងន់ធ្ងរផងដែរ។

ប្រធានាធិបតីបេឡារុស លោក Alexander Lukashenko បានបង្ហាញកាលពីចុងឆ្នាំមុនថា ការដាក់ទោសប្រហារជីវិត អាចត្រូវបានលុបចោល ប៉ុន្តែលុះត្រាតែមានការបោះឆ្នោតប្រជាមតិទូទាំងប្រទេស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ បេឡារុស បញ្ជា ឲ្យកងទ័ព របស់ ខ្លួន ធ្វើតេស្ត សម្រាប់ការ ត្រៀម ប្រយុទ្ធ