ឆ្នេរប៉ាក់ខ្លង ខេត្តកោះកុង ជាឆ្នេរសមុទ្រដ៏ស្រស់ស្អាត តែមិនសូវមានភ្ញៀវទេសចរច្រើនទៅលេង

ខេត្តកោះកុង ជាខេត្តដែលសម្បូរដោយធនធានធម្មជាតិយ៉ាងសម្បូរបែប និងជាទិសដៅទេសចរណ៍ដ៏ទាក់ទាញសម្រាប់ភ្ញៀវជាតិ-អន្តរជាតិ។ ខេត្តកោះកុង មានរមណីយដ្ឋានជាច្រើន រួមមាន ឧទ្យានជាតិ តំបន់ព្រៃកោងកាង ភ្នំ កោះ និងឆ្នេរសមុទ្រ។ តែក្នុងនោះ ឆ្នេរសមុទ្រមួយកន្លែងហាក់មានភាពស្ងប់ស្ងាត់ មិនសូវមានភ្ញៀវទេសចរទៅលេងកម្សាន្តច្រើនទេ នោះ គឺឆ្នេរប៉ាក់ខ្លង។

ឆ្នេរប៉ាក់ខ្លង គឺជាឆ្នេរសមុទ្រដែលមានទេសភាពដ៏ស្រស់ត្រកាលប្រកបដោយបរិយាកាសល្អ មានខ្យល់បរិសុទ្ធ ដែលជាទីលំហែដ៏ទាក់ទាញសម្រាប់អ្នកទេសចរ។ ឆ្នេរប៉ាក់ខ្លង មានទីតាំងស្ថិតនៅភូមិសាស្ត្រឃុំប៉ាក់ខ្លង ស្រុកមណ្ឌលសីមា ខេត្តកោះកុង។ ឆ្នេរប៉ាក់ខ្លង ហាក់មានសភាពស្ងប់ស្ងាត់ មិនសូវមានភ្ញៀវទេសចរជាតិ និងអន្តរជាតិ មកលេងកម្សាន្តច្រើនប៉ុន្មាននោះឡើយ។ អាជីវករនៅតំបន់ឆ្នេរមួយនេះ បានឲ្យដឹងថា៖ «នៅថ្ងៃធម្មតា និងថ្ងៃចុងសប្ដាហ៍ គឺមានមនុស្សមកលេងនៅឆ្នេរប៉ាក់ខ្លងតិចតួចបំផុត ប៉ុន្តែ បើក្នុងឱកាសបុណ្យជាតិធំៗដូចជា បុណ្យចូលឆ្នាំប្រពៃណីជាតិខ្មែរ ពិធីបុណ្យអុំទូក ជាពិសេសថ្ងៃឆ្លងឆ្នាំសកល ក៏ដូចជាថ្ងៃឈប់សម្រាកនៃព្រឹត្តិការណ៍ផ្សេងៗទើបមានប្រជាពលរដ្ឋ និងអ្នកទេសចរមកលេងកម្សាន្តនៅឆ្នេរនេះចំនួនច្រើន»។

អាជីវករនៃតំបន់ឆ្នេរប៉ាក់ខ្លង បានសំណូមពរ និងអំពាវនាវឲ្យប្រជាពលរដ្ឋ ក៏ដូចជាអ្នកទេសចរជាតិ និងអន្តរជាតិ មកលេងកម្សាន្តឲ្យបានច្រើនបន្ថែមទៀតនៅឆ្នេរសមុទ្រប៉ាក់ខ្លង ដើម្បីជួយជំរុញឲ្យមានការបង្កើនទេសចរណ៍ក្នុងតំបន់នោះ ក៏ដូចជាជួយបង្កើនសេដ្ឋកិច្ចជាតិ និងលើកកម្ពស់ជីវភាពប្រជាពលក្នុងមូលដ្ឋាន។

គួរជម្រាបថា រមណីយដ្ឋានក្នុងខេត្តកោះកុង រួមមាន រមណីយដ្ឋានប្រវត្តិសាស្ត្រចេតិយឃុនឆាងឃុនផែន រមណីយដ្ឋានធម្មជាតិពាមក្រសោប រមណីយដ្ឋានកោះស្ដេច ឆ្នេរនេសាទ ឆ្នេរចាំយាម ឆ្នេរប៉ាក់ខ្លង កោះកុងក្រៅ កោះស្មាច់ តំបន់អេកូទេសចរណ៍អារ៉ែង សហគមន៍អេកូទេសចរណ៍ជីផាត ទឹកធ្លាក់តាតៃ និងស្ទឹងពពក រួមទាំងកន្លែងកម្សាន្តជាច្រើនទៀត៕

ដោយ៖ ធឿន វ៉ាន់សុង