ប្រទេសណាតូមួយទៀតប្រកាសផ្ដល់យន្តហោះចម្បាំង MiG-29 ចំនួន ១៣ គ្រឿងឲ្យ អ៊ុយក្រែន

នាយករដ្ឋមន្ត្រីស្លូវ៉ាគី លោក Eduard Heger បាននិយាយកាលពីថ្ងៃសុក្រថា រដ្ឋាភិបាលរបស់ប្រទេសស្លូវ៉ាគី បានអនុម័តលើការបញ្ជូនយន្តហោះចម្បាំង MiG-29 ចំនួន ១៣ គ្រឿងទៅកាន់ប្រទេសអ៊ុយក្រែន ។

លោក Heger បាន​និយាយ​ថា​ “ជំនួយយោធារបស់ស្លូវ៉ាគី ជាពិសេសយន្តហោះចម្បាំង MiG-29 នឹងជាខែលប្រយុទ្ធដ៏សំខាន់មួយទៀតដើម្បីធានាដល់អ៊ុយក្រែន អាចការពារខ្លួនឯង និងអឺរ៉ុបទាំងមូលប្រឆាំងនឹងរុស្ស៊ី” ។

ទន្ទឹមនោះ ការប្រកាសរបស់ប្រទេសសមាជិកអង្គការណាតូមួយនេះបានកើតឡើងមួយថ្ងៃប៉ុណ្ណោះ បន្ទាប់ពីប្រទេសប៉ូឡូញប្រកាសនឹងបញ្ជូនយន្តហោះចម្បាំងសម័យសូវៀតដូចគ្នានេះចំនួន ៤ គ្រឿងទៅកាន់អ៊ុយក្រែន ។

ស្របពេលជាមួយគ្នានោះដែរ អនុប្រធានសភាអ៊ុយក្រែន លោកស្រី Olena Kondratyuk បានសម្ដែងក្ដីសង្ឃឹមថា ប្រទេសលោកខាងលិចជាច្រើនផ្សេងទៀត ក៏នឹងធ្វើតាមប៉ូឡូញ និងស្លូវ៉ាគីផងដែរ ។

គួរបញ្ជាក់ថា កាលពីថ្ងៃទី២៤ ខែកុម្ភៈ ឆ្នាំ២០២២ លោក វ្ល៉ាឌីមៀរ ពូទីន បានចាប់ផ្តើមប្រតិបត្តិការសឹកមួយនៅអ៊ុយក្រែន ដើម្បីឆ្លើយតបនឹងសំណើសុំជំនួយពីប្រមុខនៃសាធារណរដ្ឋ Donbass ខណៈរហូតមកដល់ពេលនេះ វាអូសបន្លាយពេលជាង ១ ឆ្នាំហើយ ។

បន្ទាប់មក លោកខាងលិច​បានដាក់​ទណ្ឌកម្ម​យ៉ាង​ខ្លាំងក្លា​ប្រឆាំង​រុស្ស៊ី និង​បង្កើន​ការផ្គត់ផ្គង់​សព្វាវុធ​ដល់​រដ្ឋាភិបាលទីក្រុងកៀវ ដែល​មានតម្លៃ​រាប់សិប​ពាន់​លាន​ដុល្លារ​ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ តុលាការឧក្រិដ្ឋកម្មអន្តរជាតិ ICC ចេញដីកាចាប់ខ្លួនលោក ពូទីន