តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនប្រធានាធិបតីរុស្ស៊ីលោក វ្ល៉ាឌីមៀរ ពូទីន ដោយចោទប្រកាន់ពីបទប្រព្រឹត្តឧក្រិដ្ឋកម្មសង្គ្រាមនៅអ៊ុយក្រែន ។

តុលាការនៅទីក្រុងឡាអេបាននិយាយកាលពីថ្ងៃសុក្រថា តុលាការមានអង្គហេតុសមហេតុផលដើម្បីចោទលោក ពូទីន ឲ្យទទួលខុសត្រូវចំពោះការនិរទេស និងការផ្ទេរកុមារជាង ១៦,០០០ នាក់ដោយខុសច្បាប់ពីតំបន់កាន់កាប់របស់អ៊ុយក្រែនទៅប្រទេសរុស្ស៊ី ។

ICC និយាយថា ចៅក្រមក៏បានចេញដីកាចាប់ខ្លួនលោកស្រី Maria Alekseevna Lvova-Belova ស្នងការប្រធានាធិបតីរុស្សីទទួលបន្ទុកសិទ្ធិកុមារផងដែរ ដោយលោកស្រីប្រឈមមុខនឹងការចោទប្រកាន់ដូចគ្នានឹងលោក ពូទីន ផងដែរ ។

ប្រធាន ICC លោក Piotr Hofmanski បាននិយាយថា “តាមច្បាប់អន្តរជាតិ ការបញ្ជូន ឬផ្ទេរជនស៊ីវិលពីទឹកដីដែលពួកគេកំពុងរស់នៅទៅកាន់តំបន់ផ្សេងទៀត គឺត្រូវបានហាមឃាត់ និងខុសច្បាប់ ដោយសារតែកុមារទទួលបានការការពារយ៉ាងពិសេសក្រោមអនុសញ្ញាទីក្រុងហ្សឺណែវ” ។

ពាក់ព័ន្ធនឹងបញ្ហានេះដែរ អគ្គរដ្ឋអាជ្ញាអ៊ុយក្រែន លោក Andriy Kostin បានសរសេរនៅលើបណ្ដាញ Twitter ថា “ប្រសិនបើលោក ពូទីន ចាកចេញពីប្រទេសរុស្ស៊ីពេលណានោះ គាត់នឹងត្រូវចាប់ និងប្រគល់ខ្លួនទៅកាន់ ICC តែម្ដង ហើយលោកក៏បានថ្លែងអំណរគុណចំពោះ ICC ផងដែរចំពោះសេចក្ដីសម្រេច​​ជា​ប្រវត្តិសាស្ត្រនេះ” ។

ដោយឡែក អ្នកនាំពាក្យវិមានក្រឹមឡាំង លោក Dmitry Peskov បានហៅសេចក្ដីសម្រេចរបស់ ICC ថាជា “ការខឹងសម្បារ និងមិនអាចទទួលយកបានទេ ហើយសេចក្ដីសម្រេចក្ដីបែបនេះ គឺចាត់ទុកជាមោឃៈនៅក្នុងលក្ខខណ្ឌនៃប្រព័ន្ធច្បាប់របស់រុស្ស៊ី” ។

ទោះជាយ៉ាងណាក៏ដោយ អ្នក​ជំនាញយល់ឃើញថា ឱកាស​នៃ​ការ​ចាប់​ខ្លួន​លោក ពូទីន គឺមាន​កម្រិត​ទាប​ខ្លាំង​ណាស់ ហើយទោះបីជាប្រទេស និងដែនដីចំនួន ១២៣ ជាហត្ថលេខីនៃលក្ខន្តិកៈទីក្រុងរ៉ូមក៏ដោយ ក៏រុស្ស៊ី ចិន និងសហរដ្ឋអាមេរិក មិនទទួលស្គាល់យុត្តាធិការរបស់តុលាការនេះនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ NHK