ផ្លូវមួយ​ខ្សែនៅ​ក្រុង​បាត់ដំបង ​​បើក​ការដ្ឋាន​ស្ថាបនា​​ដោយ​ចាក់​បេតុងឲ្យ​រឹងមាំ

សម្លេងទះដៃអបអរសាទររបស់ប្រជាពលរដ្ឋយ៉ាងរំពងនៅក្រោមរោងដំបូលតង់មួយកន្លែងស្ថិត​ក្នុងក្រុងបាត់ដំបង ខណះដែលសមិទ្ធផលដែលជាក្តីបំណងរបស់ពួកគេ​សម្រេច​លេច​ជា​រូបរាង។

​

កន្លងមក​ជាច្រើនឆ្នាំ​ផ្លូវមួយខ្សែស្ថិត​ក្នុងក្រុងបាត់ដំបង តែងតែ​កើតសំបុកមាន់ច្រើនពិបាកធ្វើដំណើរដោយសារតែមានជំនន់​ទឹក​​​ភ្លៀងរាល់ឆ្នាំ។ តែពេលនេះរដ្ឋបាលខេត្តបានឆ្លើយតបក្តីកង្វល់ក្នុងការធ្វើដំណើររបស់​​​ប្រជាពលរដ្ឋ ដោយចាប់ផ្តើម​សាងសង់ផ្លូវឲ្យបានរឹងមាំ ដោយ​ប្រើប្រាស់ការចាក់បេតុង​ប្រកប​ដោយ​គុណភាព​​ខ្ពស់​ជាមួយសសៃ​ដែកដ៏មានគុណភាព​។

ការជួសជុលស្ថាបនាផ្លូវមួយខ្សែនេះមានប្រវែង ២,៦០០ ម៉ែត្រ ទទឹង ១២ ម៉ែត្រតភ្ជាប់ពីផ្លូវជាតិ​លេខ ៥ ចាប់ពីរង្វង់មូលព្រះនរាយណ៍រហូតដល់ “ស្តុបមន្ទីរពេទ្យពពីរ” ដែលស្ថិត​នៅ​ក្នុងសង្កាត់ចំនួន៣ គឺ សង្កាត់​​​​ទួលតាឯក សង្កាត់អូរចា និងសង្កាត់ស្វាយប៉ោ ក្រុងបាត់ដំបង។ ក្រៅពីនេះក៏មានការដាក់លូរំដោះទឹកដើម្បីកាត់បន្ថយការ​លិច​នៅក្នុងក្រុងផងដែរដោយ​ប្រើប្រាស់លូមុខកាត់១០០។

ថ្លែងនៅក្នុងពិធីបើកការដ្ឋានជួសជុលស្ថាបនាផ្លូវនៅថ្ងៃទី ៣ ខែមេសា ឆ្នាំ២០២៣ លោក សុខ លូ អភិបាលនៃគណៈអភិបាល​​ខេត្តបាត់ដំបងបានមានប្រសាសន៍ទៅកាន់ពលរដ្ឋថា បងប្អូនអស់ក្តីកង្វល់ក្នុងការធ្វើដំណើរលើផ្លូវមួយខ្សែនេះ​ទៀតហើយ ហើយក៏មិនបារម្មណ៍បញ្ហាកកស្ទះទឹកក្នុងមូលដ្ឋាន​បងប្អូនទៀតដែរចាប់ពីពេលនេះទៅ។

ក្រៅពីស្ថាបនាផ្លូវលេខ ៤ ដែលតភ្ជាប់ពីផ្លូវលេខជាតិលេខ ៥ (រង្វង់មូលព្រះនរាយណ៍) មកដល់ផ្លូវលេខ ៥៧ (ស្ដុបពេទ្យពពីរ) ប្រវែង ២,៦០០ ម៉ែត្រ ទទឹង ១២ ម៉ែត្រ ស្ថិតក្នុងសង្កាត់ទួលតាឯក សង្កាត់អូរចារ និងសង្កាត់ស្វាយប៉ោ ក្រុងបាត់ដំបង។ កំណាត់ផ្លូវលេខ ១៥៣ (អតីតផ្លូវជាតិលេខ១០) ចាប់ពីពេទ្យពពីរ រហូតដល់​រង្វង់មូលនាង​រំសាយសក់ប្រវែង ​១,៦៧៤​ម៉ែត្រ ទទឹង ២០ ម៉ែត្រ ក៏ត្រូវបានដាក់ប្រព័ន្ធលូរំដោះទឹកមុខកាត់ ១០០ ស្ថិតក្នុងសង្កាត់ទួលតាឯក និងសង្កាត់វត្តគរ ក្រុងបាត់ដំបងផងដែរ។

ការ​ដាក់លូរំដោះទឹកជាបន្តបន្ទាប់នៅក្នុងក្រុងរួចរាល់ខ្លះមកហើយដែរ ដូចនេះសង្ឃឹមថាបើសិនជាមានជំនន់ទឹកភ្លៀង​មានកម្រិត​ខ្លាំងក៏មិនសូវបារម្មណ៍ ស្របពេលមាត់ច្រាំង​ស្ទឹងសង្កែក៏ត្រូវបានសាងសង់រួចរាល់ដែរហើយ​៕

អត្ថបទ៖ សៅ សារិទ្ធ