៥៩ខេត្តនៅ ថៃ ត្រូវវាយប្រហារដោយព្យុះរដូវក្តៅ

នាយកដ្ឋានឧតុនិយមថៃ (TMD) បានព្រមានថា ខេត្តចំនួន៥៩នៅភាគខាងជើង ឦសាន កណ្តាល និងខាងកើត នឹងរងការវាយប្រហារដោយព្យុះរដូវក្តៅ ដល់ថ្ងៃពុធទី២៦ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

TMD ប្រកាសថា ព្យុះរដូវក្តៅ អាចបណ្តាលមកពីឥទ្ធិពលនៃប្រព័ន្ធសម្ពាធខ្ពស់ លើសមុទ្រចិនខាងត្បូង។

ប្រព័ន្ធ​សម្ពាធ​ខ្ពស់​នេះ បាន​នាំ​​ខ្យល់​បក់យ៉ាងខ្លាំង ​ពី​ទិស​ខាង​ត្បូង និង​ភាគ​អាគ្នេយ៍​មកកាន់​ប្រទេស​ថៃ​ខាង​លើ ហើយមកប៉ះសីតុណ្ហភាពក្តៅ នៅភាគខាងជើងប្រទេសថៃ ដែលបណ្តាលឲ្យមានផ្គរ ខ្យល់កន្ត្រាក់ និងរន្ទះបាញ់។

លក្ខខណ្ឌអាកាសធាតុទាំងនេះ នឹងវាយប្រហារភាគឦសាន និងបូព៌ាជាមុនសិន មុននឹងមកដល់តំបន់ភាគខាងជើង និងកណ្តាលប្រទេសថៃ។

ទន្ទឹមនោះ ខ្យល់បក់ពីទិសខាងកើតនិងនិរតី ឆ្លងកាត់ឈូងសមុទ្រថៃ និងសមុទ្រ Andaman នឹងនាំភ្លៀងធ្លាក់មកលើភាគខាងត្បូង។

គួរបញ្ជាក់ថា ព្យុះនេះកើតឡើង បន្ទាប់ពី TMD ព្រមានថា សន្ទស្សន៍កម្តៅ បានឡើងដល់កម្រិតគ្រោះថ្នាក់ជាង ៤០អង្សាសេនៅក្នុងទីក្រុងបាងកក និងខេត្តចំនួនបីផ្សេងទៀតកាលពីថ្ងៃសុក្រ ហើយកាល​ពី​ចុង​សប្តាហ៍​មុន ​សីតុណ្ហភាពនៅប្រទេសថៃ បានឡើងដល់កម្រិតជាប្រវត្តិសាស្រ្ត ពោលគឺឈានដល់ ៤៥ អង្សា​សេ៕

ប្រែសម្រួល៖ Vann Vann

ប្រភព៖ Nation

ចុចអាន៖ សន្ទស្សន៍កម្តៅនៅ ថៃ ឡើងដល់ ៥៤អង្សាសេ