៣ឆ្នាំចុងក្រោយទីផ្សាររថយន្តថ្មីនាំចូលមកកម្ពុជា មានការកើនឡើងខ្ពស់

អ្នកជំនាញយានយន្តនៅក្នុងប្រទេសកម្ពុជាបានអះអាងថា រយៈពេល៣ឆ្នាំចុងក្រោយនេះទីផ្សាររថយន្តថ្មី​ដែលនាំ​ចូលមកកម្ពុជា មានការកើនឡើងខ្ពស់ ដោយសារកម្រិតជីវភាពរបស់ប្រជាពលរដ្ឋកាន់តែធូរធារជាបន្តបន្ទាប់។

ថ្លែងក្នុងសន្និសីទសារព័ត៌មានស្តីពីការទទួលបានសិទ្ធិក្នុងការផ្តល់សេវាកម្មជួសជុល និងថែទាំរថយន្ត Mercedes-Benz នៅកម្ពុជា កាលពីរសៀលថ្ងៃទី ២៤ មេសា លោក ងន សាំង អគ្គនាយកក្រុមហ៊ុន RMA Cambodia បានលើកឡើងថា រថយន្តថ្មីនាំចូលមកកម្ពុជា មានការកើនឡើ ងដែលប៉ុន្មានឆ្នាំមុនការនាំចូលមានប្រហែល១០​ទៅ២០%ទេ។ ប៉ុន្តែ៣ឆ្នាំចុងក្រោយនេះ បានកើនឡើងដល់ ៣០ទៅ៤០% ហើយឆ្នាំ២០២៣នេះ អាចនឹង​ឡើង​ដល់៥០%។ មានន័យថា រថយន្តថ្មី ៥០% និងរថយន្តមួយតឹក ៥០%។

លោកបានបន្តថា ការកើនឡើងនេះ ដោយសារជីវភាពរបស់ប្រជាជនមានការកើនឡើង មានការយល់ដឹងច្រើន​ពីអត្ថប្រយោជន៍​ការប្រើប្រាស់រថយន្តថ្មី និងហានិភ័យនៃការប្រើប្រាស់រថយន្តជជុះ។ មួយវិញទៀត តម្លៃរថយន្តថ្មី ក៏មិនខុសគ្នាប៉ុន្មាននឹងរថយន្តជជុះហើយការចំណាយថែទាំតិចជាងរថយន្តជជុះថែមទាំងមានសុវត្តិភាពផាសុខភាពការសន្សំសំចៃប្រាក់ និងពេលវេលាផងដែរ។ លើសពីនេះទៀត ការទិញរថយន្តមិនចាំបាច់មានប្រាក់១០០%ទេ ក៏អាច​ទិញបានដែរតាមរយៈការបង់រំលស់ ដែលកក្តាទាំងនេះហើយបានធ្វើឱ្យការប្រើប្រាស់រថយន្តថ្មីមានកំណើនលឿន។

លោកបានបន្តទៀតថា ការប្រើរថយន្តថ្មីក៏ជំរុញឱ្យអ្នកប្រើប្រាស់​រថយន្តផ្លាស់ប្តូរឥរិយាបថពីការទៅ​ជួសជុល​រថយន្តកន្លែងដែលមិនស្របច្បាប់ទៅកន្លែងស្របច្បាប់ និងស្តង់ដារត្រឹមត្រូវដើម្បីធានាសុវត្តិភាព៕

អត្ថបទ៖ សំអឿន