ការលក់រថយន្តរបស់ BYD ធ្លាក់ចុះគំហុកនៅខែមករា ​ដោយ​បន្តធ្លាក់ចុះ ៥ខែជាប់ៗគ្នា

ក្រុមហ៊ុនផលិតរថយន្តអគ្គិសនីយក្សចិន BYD កំពុងប្រឈមមុខនឹង​ការលក់ធ្លាក់ចុះកាន់តែខ្លាំងឡើងៗ ដោយសារតែកម្សោយតម្រូវការ និងផលិតកម្មក្នុងប្រទេសចិន ដែលធ្វើឱ្យ​ក្រុមហ៊ុនលក់ EV ដ៏ធំជាងគេលើពិភព​លោកមួយ​នេះ ត្រូវពឹងផ្អែកលើទីផ្សារនាំចេញ។

តាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ ការលក់រថយន្តរបស់ BYD បាន​ធ្លាក់ចុះជាគំហុករហូតដល់ ៣០,១% នៅខែមករា ឆ្នាំលើឆ្នាំ ដែលជាការធ្លាក់ចុះ ៥ ខែជាប់ៗគ្នា។

ការធ្លាក់ចុះនេះ បង្ហាញពី​ភាពមិនប្រាកដប្រជា ដែលក្រុមហ៊ុន BYD ត្រូវប្រឈមមុខ ចំពេលដែល​ការប្រកួតប្រជែងមាន​លក្ខណៈស្វិតស្វាញនៅ​លើ​ទីផ្សារចិន​ ដែលជាទីផ្សារលក់រថយន្តដ៏ធំបំផុតរបស់ពិភពលោក។ ​

ក្នុងឯកសារ​​​ដែល​បាន​ដាក់​នៅលើ​​ផ្សារហ៊ុន​កាលពីថ្ងៃអាទិត្យ​​ ក្រុមហ៊ុន​ BYD បាន​លក់​រថយន្ត​ចំនួន ២១០ ០៥១ គ្រឿង ទូទាំងពិភព​លោក​នៅខែមករា​។ ដោយឡែក ផលិតកម្មរថយន្តឯណោះវិញ បាន​ធ្លាក់ចុះប្រមាណ ២៩,១% ដោយបន្តនិន្នាការធ្លាក់ចុះ ដែលចាប់ផ្ដើមតាំងតែពីខែកក្កដា ឆ្នាំមុន។ ​

ថ្មីៗនេះ BYD បានដាក់ចេញម៉ូដែលថ្មីនៃ​រថយន្តកូនកាត់(សាកថ្ម និងចាក់សាំង) ជាមួយ​នឹង​បច្ចេកវិទ្យាអាគុយដែលអាចប្រើបាន​ឆ្ងាយជាងមុន ដើម្បីធ្វើឱ្យរថយន្តប្រភេទ​កូនកាត់របស់ខ្លួនកាន់តែទាក់ទាញ និងលក់ដាច់។ ​យ៉ាងណាមិញ ការលក់រថយន្តប្រភេទដដែល​ ដែល​រួមចំណែកជាងពាក់កណ្តាលនៃការលក់សរុបរបស់ BYD បានធ្លាក់ចុះរហូតដល់ទៅ ២៨,៥% ​ក្នុងខែមករា ដោយបន្តពីការធ្លាក់ចុះ ៧,៩% ពេលមួយឆ្នាំ ២០២៥។​

កាលពីខែមករា BYD បាននិយាយ​ថា ខ្លួន​កំណត់គោលដៅ​​លក់រថយន្តចំនួន ១,៣ លានគ្រឿង​​ លើទីផ្សារអន្តរជាតិ​ ដោយ​កើនឡើងប្រហែល ២៤% ពីឆ្នាំ ២០២៥ ប៉ុន្តែទាបជាងគោលដៅចាស់ ​១,៦ លាន​គ្រឿង ដែលក្រុមហ៊ុនធ្លាប់និយាយក្នុងខែវិច្ឆិកា។ ​

នៅឆ្នាំ ២០២៦ នេះ រោងចក្រ EV ថ្មីរបស់ BYD នៅប្រទេសហុងគ្រី រំពឹងថានឹង​ចាប់ផ្ដើមដំណើរការ ដោយ​បន្ថែមទីតាំងផលិតកម្មលើសពីប្រេស៊ីល និងថៃ។ ក្រុមហ៊ុន​ក៏មានគម្រោង​ដំឡើងរោងចក្រនៅក្នុងប្រទេសឥណ្ឌូណេស៊ី និងតួកគីផងដែរ៕