ថៃ ជម្លៀសពលរដ្ឋ ១៥០នាក់ ចេញពី ស៊ូដង់

ជនជាតិថៃភាគច្រើនដែលរស់នៅក្នុងប្រទេសស៊ូដង់ ត្រូវបានជម្លៀសដោយជោគជ័យទៅកាន់ប្រទេសអារ៉ាប៊ីសាអូឌីតកាលពីថ្ងៃចន្ទទី២៤ខែមេសា ហើយគេរំពឹងថា អ្នកទាំងនោះនឹងត្រលប់ទៅប្រទេសថៃវិញក្នុងសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចចិត្តធ្វើមាតុភូមិនិវត្តន៍នេះ ត្រូវបានធ្វើឡើងក្នុងអំឡុងកិច្ចពិភាក្សាដែលដឹកនាំដោយអគ្គលេខាធិការក្រុមប្រឹក្សាសន្តិសុខជាតិលោក Supoj Malaniyom បន្ទាប់មកមានការយល់ព្រមពីសំណាក់លោកនាយករដ្ឋមន្ត្រី ប្រាយុទ្ធ ចាន់អូចា។

លោកឧត្តមសេនីយ៍ Supoj បាននិយាយកាលពីថ្ងៃចន្ទថា ជនជាតិថៃចំនួន១៥០នាក់ក្នុងចំណោម២១៥នាក់​ ដែលចង់វិលត្រលប់ទៅប្រទេសថៃវិញ ត្រូវជិះរថយន្តក្រុងរយៈពេល១០ម៉ោងពីទីក្រុង ខាទុំ ទៅកាន់កំពង់ផែស៊ូដង់ នៅសមុទ្រក្រហម។

យោងតាមអ្នកនាំពាក្យកងទ័ពអាកាស, ការដឹកជញ្ជូនតាមរថយន្តក្រុងគឺជាមធ្យោបាយមួយក្នុងចំណោមមធ្យោបាយបីក្នុងការជម្លៀសពលរដ្ឋថៃ និងជាមធ្យោបាយមានសុវត្ថិភាពបំផុត ដោយសារស្ថានភាពសន្តិសុខជុំវិញអាកាសយានដ្ឋាន ខាទុំ មិនអាចធានាបាន។

បន្ទាប់មក ពួកគេដឹកតាមទូកទៅកាន់ទីក្រុង ជេដា នៃប្រទេសអារ៉ាប៊ីសាអូឌីត រួចបន្តដំណើរតាមរថយន្តក្រុងទៅកាន់រាជធានី រីយ៉ាដ ជាកន្លែងដែលពួកគេនឹងត្រូវហោះហើរចេញនៅថ្ងៃអង្គារ តាមយន្តហោះដែលរៀបចំដោយក្រសួងការបរទេស និងកងកម្លាំងអាកាស សហការជាមួយអាជ្ញាធរអារ៉ាប៊ីសាអូឌីត។

លោកឧត្តមសេនីយ៍ Supoj គូសបញ្ជាក់ថា ប្រតិបត្តិការនេះ ត្រូវបានគេរំពឹងថានឹងបញ្ចប់ក្នុងរយៈពេលពីរថ្ងៃ ឬនៅពេលដែលលែងមានជនជាតិថៃ ចង់ចាកចេញពីប្រទេសស៊ូដង់។ លោក​​បន្ត​ថា ក្រុមប្រឹក្សា​បាន​បញ្ជា​ឲ្យ​អគ្គកុងស៊ុល​កិត្តិយស​នៅ​ស៊ូដង់ ថែទាំ​ជន​ជាតិ​ថៃ ដែល​ចង់​ស្នាក់​នៅ​ក្នុង​ប្រទេស។

ស្របពេលជាមួយគ្នានោះ មជ្ឈមណ្ឌលរដ្ឋបាលខេត្តព្រំដែនភាគខាងត្បូង នឹងទទួលខុសត្រូវក្នុងការធ្វើមាតុភូមិនិវត្តន៍និស្សិត ដែលភាគច្រើនជាជនជាតិថៃមូស្លីម៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ភាគីជម្លោះនៅស៊ូដង់ យល់ព្រមបទឈប់បាញ់រយៈពេល ៧២ ម៉ោង