សាវតាត្រួសៗរបស់បវរកញ្ញា Aoom Taweeporn ម្ចាស់មកុដ MGT ដែលទើបគ្រងតំណែងក្ដៅៗ

ក្រោយឆ្លងកាត់ការប្រកួតប្រជែងជាច្រើនវគ្គ បវរកញ្ញាវ័យ ២៧ឆ្នាំ Aoom Taweeporn ដណ្ដើមបានតំណែងឯកជាម្ចាស់មកុដ Miss Grand Thailand 2023 ឈ្នះលើបេក្ខភាពបវរកញ្ញាទាំង ៧៦ខេត្តផ្សេងទៀត នៅទូទាំងប្រទេសថៃ។

ក្រៅពីរូបសម្រស់ស្រស់ស្អាត ​Aoom Taweeporn គឺជាបវរកញ្ញាដ៏មានទេពកោសល្យ សមត្ថភាពខ្ពស់ បូករួមនឹងបទពិសោធន៍ក្រាស់ក្រែលក្នុងវិស័យសម្រស់។ ចំណែកឯប្រវត្តិអប់រំវិញ បវរកញ្ញារូបនេះ ក៏បញ្ចប់ការសិក្សាថ្នាក់ឧត្តមផងដែរ។

បវរកញ្ញា Aoom Taweeporn មានឈ្មោះពេញថា Aoom Thaweepon Phingchamrat កើតថ្ងៃទី១៧ ខែមីនា ឆ្នាំ១៩៩៦ នៅខេត្ត Phetchaburi ។ នាងបានបញ្ចប់ថ្នាក់បរិញ្ញាបត្រផ្នែកគ្រប់គ្រងធុរកិច្ច ជំនាញគ្រប់គ្រងធនធានមនុស្ស នៅសាកលវិទ្យាល័យ Suan Sunandha Rajabhat រាជធានីបាងកក ហើយបច្ចុប្បន្ននាងធ្វើការជាតារាបង្ហាញម៉ូដផ្សាយពាណិជ្ជកម្ម និងជា​ Influencer មួយរូបផងដែរ។

មុនពេលចូលរួមប្រកួតកម្មវិធី Miss Grand Thailand 2023 នាងធ្លាប់ចូលរួមប្រកួតក្នុងកម្មវិធី Miss Grand Thailand 2017 ដោយកាលណោះជាប់លំដាប់រងទី ៣។ មិនតែប៉ុណ្ណោះ Aoom ធ្លាប់តំណាងប្រទេសថៃចូលរួមកម្មវិធីប្រកួតបវរកញ្ញា United Continents 2017 នៅប្រទេសអេក្វាឌ័រ ដោយឈ្នះចំណាត់ថ្នាក់​លេខ​៣ និង​បាន​ឈ្នះ​ឈុត​តំណាង​ជាតិ​ល្អ​បំផុតទៀតផង។

ដោយឡែកចំពោះឆ្នាំនេះ Aoom Taweeporn បានឈ្នះមកុដ​ MGT ហើយនឹងក្លាយជាបវរកញ្ញាតំណាងប្រទេសថៃ ដើម្បីចូលរួមការប្រកួត Miss Grand International 2023 នៅទីក្រុងហូជីមិញ ប្រទេសវៀតណាម នាខែតុលាខាងមុខ៕

ប្រែសម្រួល៖ សន្យា

ចុចអាន៖ Kimberly លើកកន្លែងរៀបការ មិនមែននៅអាល្លឺម៉ង់ដូចគ្រោងទេ

ចុចអាន៖ ក្រៅពីស្ថាបនិក Miss Grand លោកណាវ៉ាតមានក្រុមហ៊ុន ៤ ក្នុងដៃកំពុងកាន់កាប់