សហភាពអង្គការសង្គមស៊ីវិល​ចាត់ទុកសារគំរាមរបស់គណបក្សភ្លើងទៀនមានទិសដៅនយោបាយ មិនបម្រើផលប្រយោជន៍ជាតិ

សហភាពអង្គការសង្គមស៊ីវិល និងក្រុមអ្នកស្រាវជ្រាវវ័យក្មេងនៅថ្ងៃទី ១៤ ខែឧសភានេះ បានចេញសេចក្ដីប្រកាសសម្តែងការសោកស្តាយចំពោះគណបក្សភ្លើងទៀន ដែលបានចេញសេចក្ដីប្រកាសព័ត៌មាន កាលពីថ្ងៃទី១២ ខែឧសភា ឆ្នាំ២០២៣ ដោយបានគំរាមដល់ គណៈកម្មាធិការជាតិរៀបចំការបោះឆ្នោត ក៏ដូចជារដ្ឋាភិបាល។

គណបក្សភ្លើងទៀននៅថ្ងៃទី ១៣ ខែឧសភា ម្សិលមិញ បានប្រកាសថា នឹងប្រមូលផ្ដុំកម្លាំងនៅទូរទាំងប្រទេសតស៊ូមតិក្នុងករណីគណបក្សភ្លើងទៀនត្រូវបាន គ.ជ.ប បដិសេធមិនចុះបញ្ជីគណបក្សភ្លើងទៀន សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣។

សហភាពអង្គការសង្គមស៊ីវិល និងអ្នកស្រាវជ្រាវវ័យក្មេងចាត់ទុកសារគំរាមនេះមានទិសដៅនយោបាយ ដែលមិនបាននាំប្រយោជន៍ដល់សង្គមជាតិអ្វីឡើយ ក្នុងកាលៈទេសៈកម្ពុជាកំពុងបើកព្រឹត្តិការណ៍ SEA GAMES ដែលសហគមន៍អន្តរជាតិ ប្រជាពលរដ្ឋខ្មែរចូលរួមយ៉ាងច្រើនកុះករ។

ពាក់ព័ន្ធនឹងបញ្ហានេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជា នៅថ្ងៃទី ១៣ ខែឧសភា ម្សិលមិញ ក៏បានព្រមានចាត់វិធានការចំពោះថ្នាក់ដឹកនាំគណបក្សភ្លើងទៀន ប្រសិនបើហ៊ានបង្កឱ្យមានផលប៉ះពាល់ដល់សណ្តាប់ធ្នាប់​សាធារណៈ ខណៈដែលកម្ពុជា កំពុងតែរៀបចំព្រឹត្តិការណ៍​កីឡាស៊ីហ្គេម៕

អត្ថបទ៖ ឡេង ដេត