សម្ដេចតេជោ ហ៊ុន សែន ៖ ការរៀបចំព្រឹត្តិការណ៍ស៊ីហ្គេម គឺជាកាតព្វកិច្ចរបស់រដ្ឋជាសមាជិកអាស៊ាន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសឲ្យដឹងថា សម្រាប់ការរៀបចំព្រឹត្តិ​កា​រណ៍ស៊ីហ្គេមលើកទី ៣២ ដែលប្រទេសកម្ពុជាធ្វើជាម្ចាស់ផ្ទះ ត្រូវចំណាយថវិកាអស់ប្រមាណជា ១១៨លានដុល្លារ។ ជាមួយគ្នានេះ សម្ដេចតេជោ ហ៊ុន សែន ក៏បានឆ្លើយតបទៅអ្នករិះគន់មួយចំនួន ពាក់ព័ន្ធនឹងការធ្វើជាផ្ទះរបស់កម្ពុជា ក្នុងការរៀបចំព្រឹត្តិការណ៍ស៊ីហ្គេមនេះផងដែរ។

ការប្រកាសរបស់សម្ដេចតេជោ ហ៊ុន សែន ខាងលើនេះ បានធ្វើឡើងក្នុងពិធីប្រគល់សញ្ញាបត្រជូនដល់និស្សិតជ័យលាភី នៃសាកលវិទ្យាល័យភូមិន្ទកសិកម្ម វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាម នាព្រឹកថ្ងៃទី ១៥ ខែឧសភា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបែបនេះថា «អ្នកខ្លះគេស្រែកពីក្រៅថា មិនយកលុយនេះ មិនទៅយកលើស្អីផ្សេងទេ ម៉េចក៏ធ្វើស៊ីហ្គេម ពេលដែលយើងមិនធ្វើគេថា យើងហ្នឹងគឺអន់ ដល់តែយើងធ្វើគេថា យើងគឺយកលុយចាយខ្ជះខ្ជាយ រាប់ទាំងមិនយកលុយពីបរទេស ប៉ុន្តែខ្ញុំក៏គួរតែបញ្ជាក់ថា ស៊ីហ្គេម គឺជាកាតព្វកិច្ចរបស់រដ្ឋសមាជិកអាស៊ាន»។

សម្ដេចតេជោ ហ៊ុន សែន ជំរុញឲ្យអ្នករិះគន់ពាក់ព័ន្ធនឹងការធ្វើជាម្ចាស់ផ្ទះរបស់កម្ពុជា ក្នុងការរៀបចំព្រឹត្តិការណ៍ស៊ីហ្គេមលើកទី ៣២ ឆ្នាំ ២០២៣នេះ គួរតែទៅរៀនសូត្របន្ថែម ព្រោះនេះជាកាតព្វកិច្ចរបស់ប្រទេសជាសមាជិកអាស៊ាន ដែល ២ឆ្នាំម្ដង ត្រូវរៀបចំម្ដងម្នាក់៕