ទីបំផុតលោក Biden និងប្រធានសភា អាមេរិក ឈានដល់កិច្ចព្រមព្រៀង​ដោះស្រាយកម្រិតបំណុល

បន្ទាប់ពីចរចាអស់ជាច្រើនសប្តាហ៍ ពេលនេះប្រធានសភាអាមេរិកលោក Kevin McCarthy បានបញ្ជាក់ថា សេតវិមាន និងសមាជិកសភាសាធារណរដ្ឋ បានឈានដល់កិច្ចព្រមព្រៀងមួយ ដើម្បីបង្កើនកម្រិតបំណុលនិងការចំណាយសរុបសម្រាប់រយៈពេល ២ ឆ្នាំ ។

លោក McCarthy បាននិយាយថា បន្ទាប់ពីការចរចាអស់រយៈពេលជាច្រើនសប្តាហ៍ លោកបានឈានដល់កិច្ចព្រមព្រៀងជាគោលការណ៍ជាមួយប្រធានាធិបតីលោក Joe Biden ហើយក៏នឹងបញ្ចប់ការសរសេរសេចក្ដីព្រាងច្បាប់​បំណុល​ក្នុងពេលឆាប់ៗនេះផងដែរ ។

កិច្ចព្រមព្រៀងជាគោលការណ៍នេះ នឹងលើកដែនកំណត់បំណុលសម្រាប់រយៈពេល ២ ឆ្នាំ ហើយកំណត់ការចំណាយដែលមិនពាក់ព័ន្ធ ដូចជាលើវិស័យការពារជាតិ រហូតដល់កម្រិតឆ្នាំសារពើពន្ធឆ្នាំ ២០២៤ និងបង្កើន ១ ភាគរយក្នុងឆ្នាំសារពើពន្ធឆ្នាំ ២០២៥ ។

ក្រោយពីឈានដល់កិច្ចព្រមព្រៀងនេះហើយ ទាំងគណបក្សសាធារណរដ្ឋ​ និង​ប្រជាធិបតេយ្យ កំពុងដំណើរការលើច្បាប់មួយនេះ ហើយទាំងលោក Biden និង McCarthy បានបង្ហាញទំនុកចិត្តដូចគ្នាថា កិច្ចព្រមព្រៀងបំណុលអតិបរមា នឹងធ្លាក់ដល់ដៃសភាមុនកាលកំណត់ ។

ពាក់ព័ន្ធនឹងបញ្ហានេះដែរ ឆ្លើយតបទៅនឹងសំណួររបស់អ្នកសារព័ត៌មាន លោកប្រធានាធិបតី Biden បង្ហាញការជឿជាក់ថា ច្បាប់បំណុលនេះ នឹងត្រូវបានបោះឆ្នោតអនុម័ត​ដោយសភាជាក់ជាមិនខាន ហើយលោកក៏នឹងបន្តពិភាក្សាជាមួយលោក McCarthy ទៀត ដើម្បីធ្វើឲ្យប្រាកដថា គ្រប់យ៉ាងត្រូវបានសម្រេច​ជោគជ័យ ៕

ប្រែសម្រួល ៖ នាង រតនៈ

ប្រភព ​៖ NHK

ចុចអាន ៖ ក្រសួងរតនាគារ អាមេរិក ព្រមានថា ប្រទេសនឹងអស់លុយនៅខែក្រោយ