តុលាការ ICJ អនុញ្ញាឲ្យប្រទេសចំនួន ៣២ ធ្វើអន្តរាគមន៍ក្នុង “សំណុំរឿង​ប្រល័យពូជសាសន៍” របស់ អ៊ុយក្រែន

តុលាការយុត្តិធម៌អន្តរជាតិ (ICJ) កាលពីថ្ងៃសុក្របានទទួលយកសំណើពីសមាជិករបស់អង្គការសហប្រជាជាតិ (UN) ចំនួន ៣២ ប្រទេសដើម្បីចូលរួមនៅក្នុង “សំណុំរឿងប្រល័យពូជសាសន៍” ដែលផ្តួចផ្តើមឡើងដោយអ៊ុយក្រែន ។

ស្ថាប័នតុលាការកំពូលរបស់អង្គការសហប្រជាជាតិមួយនេះ បាននិយាយនៅក្នុងសេចក្តីថ្លែងការណ៍មួយថា “តុលាការ ICJ បានសម្រេចចិត្តលើការទទួលយកសេចក្តីប្រកាសធ្វើអន្តរាគមន៍ ដែលដាក់ដោយរដ្ឋចំនួន ៣២ ក្នុងសំណុំរឿងពាក់ព័ន្ធនឹងការចោទប្រកាន់ ពីបទប្រល័យពូជសាសន៍ក្រោមអនុសញ្ញាស្តីពីការទប់ស្កាត់ និងការដាក់ទណ្ឌកម្មនៃឧក្រិដ្ឋកម្មប្រល័យពូជសាសន៍” ។

យោងតាមសេចក្តីថ្លែងការណ៍បានឲ្យដឹងទៀតថា ក្រៅពីសមាជិកអង្គការសហប្រជាជាតិចំនួន ៣២ នោះ ក៏រួមមានសមាជិកសហភាពអឺរ៉ុប និងបណ្តាប្រទេសផ្សេងទៀតដូចជា ចក្រភពអង់គ្លេស កាណាដា និងនូវែលសេឡង់ ក៏ស្ថិតក្នុងចំណោមប្រទេសដែលទទួលយកសំណើនេះផងដែរ ។

ទន្ទឹមនោះ តុលាការក៏​បាន​ស្នើ​ឲ្យរដ្ឋ​ដែលទទួលយក​ការ​ប្រកាស​ធ្វើអន្តរាគមន៍នេះ ដាក់​ការ​សង្កេត​ជា​លាយលក្ខណ៍អក្សរ​ត្រឹម​ថ្ងៃ​ទី៥ ខែ​កក្កដាខាងមុខនេះ ។

នៅថ្ងៃទី២៦ ខែកុម្ភៈ ឆ្នាំ២០២២ អ៊ុយក្រែនបានដាក់ពាក្យស្នើសុំទៅតុលាការ អំពីដំណើរការនីតិវិធីប្រឆាំងនឹងសហព័ន្ធរុស្ស៊ី ជាពិសេសគឺការបកស្រាយទាក់ទងទៅនឹងជម្លោះ និងការបំពេញអនុសញ្ញាឆ្នាំ ១៩៤៨ ស្តីពីការទប់ស្កាត់ និងការដាក់ទណ្ឌកម្មនៃឧក្រិដ្ឋកម្មប្រល័យពូជសាសន៍ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លោក ពូទីន ៖ ប្រតិបត្តិការវាយលុករបស់ អ៊ុយក្រែន លើ រុស្ស៊ី ចាប់ផ្ដើម​ហើយ តែក៏បរាជ័យដែរ