ជីវិតកម្សាន្ដ

សូ ដានីតា បញ្ជាក់ថា នាងជាជនរងគ្រោះទទួលថ្មបាក់រឿងដោះបំណុលតុងទីន

បានផុស

៣ years មុន

នៅ

ថ្ងៃចន្ទ ១៩ មិថុនា ២០២៣

ដោយ

អ្នកនាង សូ ដានីតា ដែលជាតារាចម្រៀង និងសម្ដែងល្បីឈ្មោះ ថ្មីៗនេះបានទម្លាយយ៉ាងភ្ញាក់ផ្អើលនូវរឿងរ៉ាវដែលនាងកំពុងប្រឈមជាមួយការលេងតុងទីន ត្រូវគេបោកមិនសង។ នាងថា ខ្លួនគឺជាជនរងគ្រោះដោយសារកូនតុងទីនជាច្រើនគេចវេះធ្វើឲ្យរ៉ាប់រងតែម្នាក់ឯង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាស្រីកូនមួយ សូ ដានីតា បានរៀបរាប់ហេតុផលដូច្នេះថា «រៀនអានរៀនចាំសាជាថ្មីអ្វីៗ នៃការលាបពណ៌ក៏មានច្រើនមកលើខ្ញុំរួចហើយ អរគុណពិភពលោកដែលតែងតែមានមនោសញ្ចេតនាក្លែងក្លាយមកលើរូបខ្ញុំរហូតមក។ ហើយពួកអ្នកបោកខ្ញុំទៅឲ្យខ្ញុំទទួលថ្មបាក់តែម្នាក់ឯង ល្មមក្រោកពីងាប់នៅ? លុយតុងទីនខ្ញុំសងគេ គេប្រមាថខ្ញុំ ខ្ញុំរ៉ាប់រងក៏ព្រោះតែពួកសន្តានអន់ជាងសត្វឯងទាំងអស់ហ្នឹង»។

តារាចម្រៀងអ្នកនាង សូ ដានីតា បានបន្ថែមទៀតថា «រៀបចំផុសម្ដង ១ ម្ដង ១ ឲ្យគេស្គាល់មុខពួកបោក និងមិនឲ្យពួកអ្នកឯងមានមុខធ្វើការអ្វីបាន ព្រោះបាត់ឈឹងយកលុយរត់គេចបាត់ស្រមោល»។ ក្នុងនោះក៏មានការលើកទឹកចិត្តអ្នកនាង សូ ដានីតា ផងដែរ ដោយខ្លះថា ស៊ូឡើង មានមិនដែលបីដំណ ក្រមិនដែលបីជំនាន់ ឲ្យតែសល់ជីវិតត្រូវតែមានសង្ឃឹម។

សូមបញ្ជាក់ដែរថា នាអំឡុងប៉ុន្មានឆ្នាំចុងក្រោយនេះ គេឃើញមានតារាប្រុស-ស្រីល្បីៗមួយចំនួន បានផ្ទុះនូវរឿងរ៉ាវដ៏រសើប និងភ្ញាក់ផ្អើលខ្លាំងនៅក្នុងសង្គមខ្មែរប្រហែលគ្នាជុំវិញការលង់ខ្លួនអស់លុយរាប់សិបម៉ឺនដុល្លារ ដោយហេតុផលផ្សេងៗគ្នា ពាក់ព័ន្ធបញ្ហា នៃការលេងតុងទីននេះផងដែរ៕

អត្ថបទ ៖ ចាន់រ៉ា