សមយុទ្ធយោធារួមគ្នាលើកដំបូងរបស់អាស៊ាន ត្រូវផ្លាស់ប្តូរទីតាំង

យោធាឥណ្ឌូណេស៊ី បាននិយាយកាលពីថ្ងៃពុធទី២១ខែមិថុនាថា សមាគមប្រជាជាតិអាស៊ីអាគ្នេយ៍ បានសម្រេចចិត្តមិនធ្វើសមយុទ្ធរួមគ្នាលើកដំបូងរបស់ខ្លួន នៅជិតដែនទឹកដែលមានជម្លោះជាមួយប្រទេសចិននោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងឡើយ សមយុទ្ធរួមរបស់ប្លុកនេះ គ្រោងធ្វើឡើងនៅសមុទ្រ Natuna ខាងជើង ដែលឥណ្ឌូណេស៊ីអះអាងថាជាតំបន់សេដ្ឋកិច្ចផ្តាច់មុខរបស់ខ្លួន ប៉ុន្តែនៅទីនោះកប៉ាល់ចិន ល្បាតម្តងម្កាល។

ពេលនេះ យោធាឥណ្ឌូណេស៊ី បាននិយាយនៅក្នុងសេចក្តីថ្លែងការណ៍មួយថា សមយុទ្ធរបស់អាស៊ាន នឹងត្រូវធ្វើឡើងក្នុងសមុទ្រ Natuna ខាងត្បូងវិញ នៅចន្លោះថ្ងៃទី១៨ដល់២៥ខែកញ្ញា។

យោធានិយាយថា ការសម្រេចចិត្តនេះ ធ្វើឡើងនៅក្នុងសន្និសីទមួយរវាងប្រធានអាស៊ានគឺឥណ្ឌូណេស៊ី និង សមាជិកអាស៊ានផ្សេងទៀត។

យោងតាមសេចក្តីថ្លែងការណ៍ពីយោធាឥណ្ឌូណេស៊ី, សមយុទ្ធនេះនឹងមានការចូលរួមដោយមេដឹកនាំយោធាមកពីប្រទេសអាស៊ានទាំង១០។

ប្រមុខយោធាលោក Yudo Margono បានប្រាប់អ្នកសារព័ត៌មានកាលពីដើមខែនេះថា សមយុទ្ធ នឹងផ្តោតលើសន្តិសុខនិងជួយសង្គ្រោះដែនសមុទ្រ ហើយមិនពាក់ព័ន្ធនឹងប្រតិបត្តិការប្រយុទ្ធឡើយ។

គួរបញ្ជាក់ថា ពីមុនសមាជិកអាស៊ាន ធ្លាប់ធ្វើសមយុទ្ធយោធាជាមួយសហរដ្ឋអាមេរិក និងចិន ប៉ុន្តែប្លុកនេះ មិនដែលធ្វើសមយុទ្ធយោធារួមជាមួយគ្នាទេ៕

ប្រែសម្រួល៖ Vann Vann

ប្រភព៖ VN Express

ចុចអាន៖ អាស៊ាន ប្រកាសធ្វើសមយុទ្ធយោធារួមគ្នាលើកដំបូង នៅសមុទ្រចិនខាងត្បូង