ស្គាល់អត្តសញ្ញាណទាហានអាមេរិក ដែលរត់ឆ្លងកាត់តំបន់គ្មានយោធា ចូលកូរ៉េខាងជើង

ទាហានអាមេរិកម្នាក់ បានឆ្លងកាត់តំបន់គ្មានយោធា ដែលពុះចែកប្រទេសកូរ៉េខាងជើង និងកូរ៉េខាងត្បូងដោយមិនមានការអនុញ្ញាត កាលពីថ្ងៃអង្គារទី១៨ខែកក្កដា ប៉ុន្តែគាត់ធ្វើសកម្មភាពនេះ ដោយចេតនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រី​អាមេរិកនិយាយ​ថា ទាហាន​រូប​នោះ​កំពុង​ធ្វើ​ដំណើរតាមលក្ខណៈស៊ីវិល​នៅភូមិ Panmunjom ក្នុងកម្មវិធីធ្វើដំណើរមួយដែលគេរៀបចំ ដើម្បីផ្តល់ឱកាសទៅមើល ទាហានកូរ៉េខាងត្បូងឲ្យបានជិត នៅក្នុងតំបន់ដែលគ្រប់គ្រងដោយអង្គការសហប្រជាជាតិ។

ទោះបីជាយ៉ាងណាក៏ដោយ ក្រុមមន្ត្រី​មិន​បាន​បញ្ជាក់​ពី​មូលហេតុ​ដែល​គាត់​ឆ្លង​កាត់​នោះ​ទេ ប៉ុន្តែ​​និយាយ​ថា អាជ្ញាធរ​ក្នុង​ប្រទេស​កូរ៉េ​ខាង​ជើង ​បាន​ចាប់​គាត់​ទៅ​ឃុំ​ឃាំងហើយ។

មន្ទីរបញ្ចកោណបានបញ្ជាក់អត្តសញ្ញាណទាហានរូបនោះថា មានឈ្មោះ King Travis ដែលចូលបម្រើកងទ័ពតាំងពីខែមករា ឆ្នាំ២០២១មក ហើយគាត់ជាទាហានថ្នាក់ទី២ នៅផ្នែកទ័ពសេះ ដោយមានឯកទេសខាងឈ្លបយកការណ៍។

ស្របពេលជាមួយគ្នានោះ រដ្ឋមន្ត្រីការពារជាតិអាមេរិក លោក Lloyd Austin និយាយថា “ខ្ញុំពិតជាមានការព្រួយបារម្ភជាទីបំផុត អំពីសុខុមាលភាពកងទ័ពរបស់យើង។ ដូច្នេះហើយ យើងនឹងនៅតែផ្តោតលើរឿងនេះ ហើយម្តងទៀត នឹងមានព័ត៌មានក្នុងរយៈពេលប៉ុន្មានថ្ងៃខាងមុខ”។

គួរបញ្ជាក់ថា មន្ត្រី​ក្រសួងការបរទេស​អាមេរិក តែងតែ​ណែនាំ​កុំឲ្យ​ធ្វើដំណើរ​ទៅកាន់ប្រទេ​កូរ៉េខាងជើង​ ដោយព្រមានអំពីហានិភ័យធ្ងន់ធ្ងរនៃការចាប់ខ្លួន និងការឃុំឃាំងរយៈពេលវែង។

តំបន់គ្មានយោធា (DMZ) គឺជាតំបន់មួយក្នុងចំណោមតំបន់ដែលមានកងកម្លាំងយាមកាមរឹងមាំបំផុតនៅលើពិភពលោក ហើយវា​ពោរពេញ​ទៅ​ដោយ​គ្រាប់​មីន ព័ទ្ធជុំវិញ​ដោយ​របង​អគ្គិសនី និង​លួសបន្លា ព្រមទាំងបំពាក់​កាមេរ៉ា​ឃ្លាំមើលផងដែរ ជាពិសេសឆ្មាំប្រដាប់អាវុធ ឈរជើងឃ្លាំមើល ២៤ ម៉ោងក្នុងមួយថ្ងៃតែម្ដង ៕

ប្រែសម្រួល៖ Vann Vann

ប្រភព៖ BBC, NHK

ចុចអាន៖ កូរ៉េខាងជើងត្រូវបានគេឃើញដំឡើងឧបករណ៍បំពងសំឡេងជាថ្មីនៅព្រំដែនខណៈអ្នករត់ចោលស្រុកបន្តបង្ហោះខិត្តប័ណ្ណ