ឯកឧត្តម ហ៊ុន ម៉ានិត អរគុណពលរដ្ឋនិង​ជំរុញ​​អ្នក​គាំទ្រ​បោះ​ឆ្នោត​ជូន​គណបក្ស​ប្រជាជនកម្ពុជា

ឯកឧត្តម ហ៊ុន ម៉ានិត បាន​អះអាង​ថា គណបក្សប្រជាជនកម្ពុជានៅរួមសុខរួមទុក្ខជាមួយប្រជាជនគ្រប់ពេលវេលា និងកាលៈទេសៈធានាសុខដុមរមនាជាតិសាសន៍ និងសាសនា លើកស្ទួយជីវភាពប្រជាជន។

ឯកឧត្តម ហ៊ុន ម៉ានិត ដែល​បច្ចុប្បន្នជាប្រធានក្រុមការងារគណបក្សចុះមូលដ្ឋានស្រុកចំការលើ និង​ជា​អនុប្រធានទី១ នៃក្រុមការងារគណបក្សចុះមូលដ្ឋានខេត្តកំពង់ចាមបាន​បញ្ជាក់ថា បោះឆ្នោតជូនគណបក្សប្រជាជនកម្ពុជា ដើម្បីសន្តិភាពនិងការអភិវឌ្ឍ។

ឯកឧត្តម ហ៊ុន ម៉ានិត ក៏​ថ្លែងអំណរគុណដល់ក្រុមការងារគណបក្ស អង្គការចាត់តាំងគណបក្សគ្រប់ជាន់ថ្នាក់ សមាជិក សមាជិកាគណបក្សប្រជាជនកម្ពុជា ចំពោះកិច្ចខិតខំប្រឹងប្រែង លះបង់កម្លាំងកាយចិត្ត បម្រើប្រជាជន និង​ប្រជាពលរដ្ឋទាំងអស់រួមទាំងអ្នកស្រុកចំការលើ និងស្រុកស្ទឹងត្រង់ ដែលតែងតែគាំទ្រមាគ៌ា​ដឹកនាំ និងគោលនយោបាយគណបក្សប្រជាជនកម្ពុជា ជាពិសេសគាំទ្រសម្តេចតេជោ ហ៊ុន សែន ជានាយករដ្ឋមន្ត្រី និងឯកឧត្តម ហ៊ុន ម៉ាណែត ជាបេក្ខជននាយករដ្ឋមន្ត្រីអនាគត។

ជាថ្មី​ម្តង​ទៀត ឯកឧត្តម​អំពាវវនាវ​សូមបងប្អូន អ៊ំពូមីង លោកយាយលោកតា អញ្ជើញទៅបោះឆ្នោតទាំងអស់គ្នានៅថ្ងៃទី ២៣ ខែកក្កដា ខាងមុខនេះ ដោយ​បោះឆ្នោតជូនគណបក្សប្រជាជនកម្ពុជាលេខរៀងទី១៨៕